Health is wealth

Grabe kabangis ang kainit sa adlaw karon. Ultimong kandila sulod sa balay mabawog, mahumok ug paingon na nga malanay. Naalarma ang Department of Health ug miawhag sa katawhan sa dili pagpatuyang sa pagbulad sa init kay kini nagdala’g daghang sakit.

Usa ka balikbayan, kinsa bag-o lang nga mibakasyon dinhi sa ato, wala na makauli sa Amerika kay na-heat stroke ug wala na matabang, namatay gyud. Ako mismo, nabiktima sab sa naglagiting nga kaigang.        

Kompiyansa ra ko nga mibaktas gikan sa National Bookstore sa Mango Avenue hangtud sa Chong Hua Medical Arts aron magpatsek-ap sa usa ka gastrologist. Puno ang tanang parking area ug didto na lang ko parking sa  General Maxilom Avenue.

Taastaas gyud ang inalisngaw sa kainit nga akong giantos kay wala man ko’y pandong nga nakasalipod sa akong ulo nga singtanon. Resulta, pagkagabii, gitakboyan ko sa grabeng subaw ug gahing ubo, diin usahay mora’g mapawong ang akong pagginhawa.

Gipaadmit ko ni misis sa ospital ug didto nahibaw-an nga ang oxygen sa akong lawas, dili na normal.

Sa laktud, gitakboyan ko’g pneumonia nga ang hinungdan mao ang pagbulad ko sa grabeng kainit sa adlaw nga atong masinati ning panahon.

Ang grabeng kainit nagumikan kay ang ozone layer pwerte na nga nipisa human gub-a sa mga mapasagarong negosyante ang katahom sa kabukiran ug kalasangan nga dako unta kaayo’g ikatabang sa grabeng kainit nga daw naghuramentadong miatake sa tawo aron paghatag og mensahe nga angay gyud diay’ng panggaon ang mother earth, nungka nga pasipad-an!

Sa pagsulat ko niini, ania pa ko sa ospital diin ang akong partial hospital bill mitatak na og P100T kapin. Ang paet kay wa’y trabaho, wala’y sweldo.

Tuod, ang Social Security System andam moabaga sa inadlaw’ng sweldo, pero kutob ra sa P450 ang matag adlaw, unya dili pa ihatag dayon.

Paita! Bisa’g na-senior citizen na ta’g panarbaho, wa gyud gihapo’y mahikap inigkasakit! Mao nga nakaingon ko, nga health is wealth.

Labi na kitang mga kabus, angay gyud nga ampingan nato ang atong panglawas, kay mao ra gyud ni ang atong puhonan.

Pero naglibog ko. Daghan laging pobre nga bisa’g wala’y klarong kaon, magsige gihapon pagpalit og shabu.

Bisa’g gitukhang na, hala, padayong nag-shabu! Dili gyud mahadlok nga masakit. Ngano? Kay alang nilang mga adik, shabu is wealth.