Adlaw sa paghukom

Moabot na ang paghukom. Ugma na gayud nato mahibaw-an ang desisyon sa Investment Coordination Committee sa National Economic Development Authority (NEDA-ICC) kon madayon, o dili ang lakang pag-implementar sa Bus Rapid Transit (BRT) project dinhi sa dakbayan sa Sugbo.

Kon motugot ang NEDA-ICC, siyento porsiyento na gayud nga madayon ang BRT nga hagbay ra nga giduso ni Mayor Tomas Osmeña nga matuman dinhi sa siyudad. Sa kantidad nga P16 bilyones, molagbas ang mao nga BRT gikan sa Bulacao paingon ngadto sa Talamban.

Apan kon modumili ang NEDA-ICC niini, mora’g bola nga mobuto ang paningkamot ni Osmeña ug mga opisyal sa dakbayan pagpatuman sa BRT.

Ug nagpasabot kini nga gilupig sila sa kamada sa mga mikontra niining mao nga proyekto, ilabi na ang kampo ni Secretary Michael Dino, ang Presidential Assistant for the Visayas.

Gusto sa kampo ni Dino nga Light Rail Transit ang i-implementar sa siyudad. Hinuon dili lang sa dakbayan, kon dili, lakip na sa Metro Cebu, gikan sa Carcar City sa south ngadto na sa siyudad sa Danao sa norte.

Ug aduna na kuno mga investors ang andam nga mo-finance niini.

LRT man o BRT, nagkinahanglan gayud ang Metro Cebu og moderno nga mass transport system. Gani ang kawad-on niini mao ang hinungdan sa grabeng trapik nga milapdos karon sa nag-unang mga karsada sa metro. Hagbay ra kita nga gimaldisyon niining mao nga problema.

Hinuon sa duha, mas dali ra nga ipatuman ang BRT. Kini tungod kay menos kini sa gasto ikumpara sa LRT nga giingon nga mokabat ngadto sa P150 bilyones.

Apan ang problema sa BRT mao nga sa dakbayan lang kini sa Sugbo mopasada ug mawala sa passing ang uban nga mga local government units sa Metro Cebu.

Ang nakaayo sa LRT mao nga entiro Metro Cebu gayud ang makabenepisyo niini. Bisan pa sa ka dako sa gasto ug ka taas nga panahon sa pagmugna niini, apan long-term kini nga solusyon sa nagkagrabe nga problema sa kahuot sa ato nga mga karsada dinhi sa metro.

Angay lang gayud nga adunay moderno nga sistema sa pampubliko nga transportasyon ang Sugbo.

Sentro kini sa komersiyo sa Kabisayaan ug Mindanao ug salikwaot nga paminawon nga hangtud karon, walay world class transport system ang Sugbo.