Tomas ug drugas

Gipasanginlan ni Justice Secretary Vitaliano Aguirre II si Mayor Tomas Osmeña nga usa ka drug protector. Ang pasangil ni Aguire gibase niya sa pinirmahan nga affidavit ni Reynaldo “Jumbo” Diaz, ig-agaw sa gipatay nga giingong drug lord nga si Jeffrey Diaz alyas Jaguar.

Base sa affidavit ni Jumbo Diaz gipasanginlan niya si Osmeña nga nakadawat og P7 milyones gikan ni Jaguar. Ang P2 milyones, tabang ni Jaguar sa pagkaospital ni Osmeña, ug ang laing P5 milyones, hinabang kini sa kampanya sa eleksiyon.

Apan gipanghimakak ni Osmeña ang pasangil ug misumbalik kini sa pagpasangil ni Aguirre nga maoy protector gumikan sa pagkabasura sa kasong drug trafficking batok sa mga drug personality nga sila si Peter Lim, Kerwin Espinosa, Lovely Impal ug uban pa.

In fairness ni Secretary Aguirre, iyang gibali ang resolution sa mga sakop sa National Prosecution Service nga ubos sa iyang buhatan ug wala tugoti nga makalingkawas sa kasong ilang giatubang ang mga drug personality.

Apan ang ngalan pud ni  Osmeña wala sa listahan sa Philippine Drug Enforcement Agency (PDEA) sa mga tawo nga nalambigit sa gidili nga drugas.

Pero mas maayong tan-awon kining maong mga sirkumstansya. Sa dihang napili nga presidente si Rodrigo Duterte, daghang drug personality ang mitahan sa ilang kaugalingon sa kapolisan. Gani, miapil sa panon pag-adto sa kapolisan ang mga wala sa lista samtang ang uban nanglayas tungod sa kahadlok.

Usa sa gustong motahan sa iyang kaugalingon ngadto mismo ni Presidente Duterte mao si Jaguar apan napatay siya didto sa kaulohan sa mga polis nga taga Sugbo nga sila si Rex Derilo ug George Ylanan.

Nganong miabot sa kaulohan ang mga polis nga taga Sugbo nga sila si Derilo ug Ylanan? Gisundan nila si Jaguar aron dakpon, o aron pahilumon? Sila gituohan nga konektado ni Osmeña.

* * *

Maayong Fiesta sa mga taga Barangay Santo Tomas, Trinidad, Bohol nga nagsaulog sa ilang Fiesta karong adlawa.