Eleksiyon na gyud

Madayon na ang eleksiyon sa barangay ug Sangguniang Kabataan karong Mayo 14, bisan pa man sa duha ka balaudnon nga napasar sa Kongreso nga nag-uswag sa Barangay ug SK elections unya na sa buwan sa Oktubre ning tuiga.

Gipapas sa Senado ang kahigayonan nga mauswag ang eleksiyon human kini mapakyas sa pagpalabang sa susamang balaudnon gumikan sa kahagip-ot na sa panahon. Apan kon si Presidente Rodrigo Duterte momando sa Kongreso sa pagpahigayon og special session alang sa pag-uswag sa eleksiyon, hayan mapugngan pa kini. Apan subidahon na kini nga mahitabo.

Nunot niini, gilatid na sa Commission on Elections ang mga kalihokan sa umaabot nga eleksiyon pinaagi sa gipagawas niini nga Resolution Number 10-26 nga nagbutang sa Abril 14 hangtud sa Mayo 21 nga Election period. Niining tungora sugod usab nga ipatuman ang gun ban.

Sa Abril, 14 hangtud sa 20, mao na ang pagpangdawat sa mga Certificate of Candidacy sa mga mokandidato sa eleksiyon, samtang gitugot ang pagsugod sa pagpangampanya sa Mayo 4 hangtud sa Mayo 12. Gidili na ang pagpangampanya sa pagka Mayo 13.

Pagka Mayo 14, adlaw sa eleksiyon, ang botasyon magsugod sa alas 7:00 sa buntag ug tak-opan sa pagka alas 3:00 sa hapon, dayon sundan kini sa iniphanay sa boto.

Mano-mano ang pag-ihap sa mga boto tungod kay barangay man lang ang coverage niini, dili pareho sa National ug Mid-term elections diin makina ang gigamit sa pag-ihap sa boto tungod kay lapad man ang coverage niini.

Tungod sa eleksiyon, ang DILG naglaraw sa paglusad og programa nga gitawag nila og Matino, Mahusay at Maasahang Barangay ug SK officials campaign. Magpagawas usab sila og mga posters nga ilang ipapilit sa kada barangay aron magsilbi nga giya sa mga botante sa ilang pagboto.

* * *

Happy Birthday sa among kapitan sa Barangay Quiot, dakbayan sa Sugbo nga si Pancrasio Illaga Esparis nga nagsaulog sa iyang adlaw nga natawhan karong adlawa. Happy Birthday Kap.