Sagpa sa kampanya

_{Nabutang karon sa “hot water” ang Department of Justice human gibasura sa mga public prosecutors ang kaso sa ilegal nga drugas batok nila ni Peter Lim, Kerwin Espinosa, ug kaubanan.}

_{Kahinumdoman, kini si Kerwin Espinosa mismo miangkon atol sa gipahigayon nga Senate hearing kalabot sa iyang papel sa illegal drug trade, diin na-mention niya ang ngalan nga Peter Lim, apan nabasura ang iyang kaso. Gibasol sa DOJ ang Criminal Investigation and Detection Group (CIDG) nga maoy nakaingon sa pagkabasura sa kaso tungod sa kahuyang, o wala’y ebidensya.}

_{Matud ni Justice Secretary Vitaliano Aguirre nga wala isumiter sa CIDG ang transcript sa Senate inquiry ug wala usab masayod ang mga public prosecutors sa gipangkompisal kaniadto ni Kerwin didto sa Senado.}

_{Aw gadanghag pud diay ang CIDG niini kay gikinahanglan man usab kaayo kadto isip supporting evidence ang transcript sa testimonya ni Kerwin aron mopalig-on sa kaso batok kaniya. Apan mabaw ra usab ang rason ni Secretary Aguirre kay kon naghimo pa sa ilang assignment ang mga public prosecutors, masuta unta nila ang angayan buhaton.}

_{Apan ang nakit-an nila, mao ra man ang ilang gustong makita. Wala kaha masalipdi lang sa mga binandol ang ilang panan-aw?}

_{Bitaw, dili pa angayan nga malipay sila si Lim ug Espinosa kay mismo si Presidente Duterte mibahad nga si Aguirre ang ipuli sa prisohan, kon makalingkawas sa kaso sila si Kerwin ug Lim.}

_{Ang mga prosecutors nga nag-dismiss sa kaso nila ni Lim, Kerwin ug kaubanan nga gipasanginlang mga drug personalities, gipaimbestigahan na sa NBI, samtang wala ug tuo ang pagsaway nga nadawat ni Secretary Aguirre nga ang uban gusto na nga siya paluwaton sa katungdanan.}

_{Dako kaayong sagpa sa kampanya sa illegal drugs kon makalusot ang mga dagkong ‘isda’ kansang pangalan naggikan mismo sa baba sa presidente.}