Unsa’y buhaton kon dili makabayad sa rental ang nag-abang?
Dear Atty. Divine,
Duna ko’y apartment nga gipaabangan. Usa ka ahente ang nag-abang ug mao kini gipuy-an sa iyang pamilya. Tulo ka tuig ang among kontrata nga gipirmahan og kapin sa tuig na silang nagpuyo niini. Apan since December 2017, wa na siya makabayad sa rental ug mag-upat ka buwan na karong Marso nga wa siya mobayad.
Akong naestorya ang iyang asawa ug ako siyang gisultian nga mangita na lang og laing kapuy-an, apan hangtud karon wa pa man gihapon sila mo-vacate sa akong apartment.
Unsay angayan nako nga buhaton? Daghang salamat. — Jimmy
Dear Jimmy,
Ang una nimong buhaton mao ang pagpadala og demand letter sa nag-abang ug imo siyang paninglan sa rental sulod sa upat ka buwan, ug mo-demand sab ka niya sa pag-vacate sa property.
Kon dili gihapon siya mobayad, then imong siyang ireklamo sa barangay aron adto mo mag-areglo. Apan kon dili gihapon mo ma-settle sa barangay, then mangayo ka og Certification to file action ug imong ipasaka ang kasong unlawful detainer sa korte batok kaniya. Kon paboran sa korte ang imong kaso, then mandoan siya sa pagbayad sa rental nga wa niya bayri ug mandoan sab siya sa korte sa pag-vacate sa property. Thanks and God bless.- Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest