Kanus-a mahimong valid ang holographic will?

Dear Atty. Divine,

Ang akong lola nga namatay adunay gibilin nga yuta. Wa ni siya maminyo ug wa sab siya’y anak. Kining yutaa mao ni ang among gipuy-an karon. Sa wa pa mamatay ang akong lola, ang akong lolo nga iyang igsuon, maoy nag-atiman kaniya ug maoy iyang gibinlan sa property.

Ang titulo sa maong yuta iya sab nga gihatag ni lolo. Wa’y gipirmahan nga dokumento si lola nga naghatag sa maong property kang lolo, except sa iyang diary nga iyang gibutang didto nga ang tanan niyang kabtangan, iyang ihatag ni lolo nga maoy miunong kaniya.

Apan niadtong miaging buwan, ang usa sa mga pag-umangkon ni lola, nagpadala og suwat ni lolo kay gusto siyang mangayo og share. Ang akong pangutana, magamit ba ni lolo isip ebidensya ang diary ni lola pagmatuod nga gihatag kaniya ang maong yuta? Daghang salamat. —  Roseann

Dear Roseann,

Base sa Article 810 sa atong Civil Code, ang Holographic Will mahimo nga valid kon kini entirely written sa testator, adunay petsa ug adunay pirma sa testator. Busa kon ang diary sa imong lola nga naghatag sa iyang property ngadto sa imong lolo, iyang sinuwat ang tanan, adunay petsa ug adunay pirma sa imong lola, then makonsiderar kini nga Holographic will, apan sa dili pa kini hingpit nga ipatuman kinahanglan pa kini nga ipa-probate sa korte.

Apan kon pananglit wa’y petsa ug wa’y pirma ang maong diary, then  dili kini makonsiderar nga valid ug ang intestate succession maoy mo-govern sa kabilin nga yuta sa imong lola. Thanks and God bless.- Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo