E-pansayan
Dihang nangabang mi og balay sa Tabango, Leyte, wa kami kaugalingong pansayan. Nakigsawo ra mi sa ubang pamilya nga nangabang sab sa silingang mga pinuy-anan. Gihatagan og yawe ang matag pamilya.
Duha ka pansayan nga pinatukod sa munisipyo ang nahimutang pila ka metro gikan sa amo. Ang una para namo nga may yawe. Ang ikaduha giablihan alang sa publiko. Bisan giunsa namo og limpiyo sa kinandadohang pansayan, mag-antos ming tanan sa labihang kabaho sa wa’y atiman nga publikong pansayan.
* * *
Mas lisud ang kahimtang sa pipila ka eskuylahang publiko. Gawas nga nihit ang pansayan, wa pa gyuy klarong suplay sa tubig. Mao nga ang mga pansayan inay makatabang, nahimo na hinuon nga hulga sa kahimsog sa mga tinun-an ug mga magtutudlo.
May nakaplagan pa gani ang Department of Health (DOH) nga mas seryusong mga sakit tungod sa kakuwang ug kalang-og sa mga pansayan sa publikong mga eskuylahan: Dili na manginom og tubig ang mga bata aron nga dili mapugos pag-adto sa pansayan; o pugngan ang sugo sa lawas nga mosangpot sa infection ug ubang komplikasyon.
* * *
Sa labing uwahing ihap sa World Health Organization (WHO), gibanabana nga 26 milyones ka Pilipinhon ang wa’y pansayan. Maong napugos ug naanad na lang sa paglabay sa ilang hugaw sa tago ug bakanteng mga luna o sa mga kanal ug mga suba.
Nga makamugna og mas lapad nga hulga sa kahimsog sa publiko. Makahimong mas hugaw sa palibot, makadugang sa hulga sa kaluwas sa pagkaon ug apil na sa mga tinubdan sa tubig. Mao nga mas daghan na ang nangaigo ug nangamatay sa mas grabeng mga sakit sa ginhawaan.
* * *
Mas daghang wa’y pansayan sa India, kapin sa 600 milyones. Lahi sa ato nga kutob ra sa istorya, may mga pundok sa India nga nidangop sa bag-ong mga teknolohiya paglimpiyo sa palibot.
Bunga sa ilang paningkamot ang e-toilet: Kinabaratohang solar-powered ug unmanned nga pansayan.
Ang pagbutang og sensiyo moabli sa pultahan sa pansayan, mopasiga sa suga, mohatag og audio commands, mo-flush og 1.5 ka litrong tubig human sa tulo ka gutlo nga paggamit, o 4.5 ka litro kun mas taas ang paggamit ug molimpiyo sa lingkuranan human sa lima ngadto sa 10 nga mogamit.
* * *
- Latest
