Usbaw nga budget alang sa mga senior citizens

Ang Konseho sa dakbayan sa Sugbo miusbaw sa allocation sa financial assistance alang sa mga senior citizens ning dakbayan, gumikan sa pagdaghan sa mga senior citizens, gikan sa 60,000 ngadto na sa dul-an 70,000.

Ang Sangguniang Panlungsod Resolution No. 3-1451-2015 nagkanayon: “Resolved to request the Local Finance Committee and the Committee on Budget & Finance to make the necessary amendment on their respective recommendations pertaining to the allocation for financial assistance to senior citizens in the 2016 Annual Budget by increasing said allocation from Seven Hundred Twenty Million Pesos (P720,000,000) to Eight Hundred Seven Million Six Hundred Thousand Pesos (P807,600,000).

So, hapit na mahimong usa ka bilyon ka pesos ang gastuon sa dakbayan sa Sugbo, salapi sa lungsod, alang sa mga senior citizens. Ingon niini ka pinangga ang mga senior citizens dinhi sa dakbayan sa Sugbo, sa mga namunoan sa dakbayan.

Unta magpadayon ang maong mga pagpangga bisan kun muabot na unya og kapin sa usa ka bilyon ka pesos ang budget alang sa mga senior citizens.

Manghinaut usab kita nga dili maapektohan ang mga basic services sa dakbayan, ilabina na kun mahurot na’g kahalin ang mga yuta sa SRP. Kinahanglang adunay permanente nga tinubdan sa pundo, o source of funds nga ugmaron aron magpadayon kining maong ayuda gikan sa City Hall.

At any rate, budgeted na ang financial assistance alang sa mga senior citizens, niining tuiga. Ug lagmit, ma-quarterly na ang pagpanghatag niini – ug unta, dili muagi og lalis sulod sa Konseho.

Ug niay maayong tun-an sa City Hall. Daghan kaayong mga senior citizens nga mga masakiton na, ang uban bedridden na gyud. Ngano man nga ang ilang madawat pareho ra man sa madawat sa mga lig-on pa og lawas nga mga adunahan pa?

Unta, kahatagan sila og mas dako nga tabang.

Ang maong mga masakiton, isakay sa habal-habal, ang uban mag-wheelchair ug magsungkod, agakon paingon sa disbursing officers, ug ang ilang madawat pareho ra sa madawat sa mga baskog pa ang lawas, nagsakay sa mahalon ug airconditioned nga mga kotse o van, gikan sa high-end nga mga subdivision.

Kun buot hunahunaon, wala sila magkinahanglan sa financial assistance kay mas datu ug mas hamugaway pa sila kay sa City Hall.

Hinaut nga ang City Hall makakita og mga paagi nga kahatagan og mas dako nga pagtagad ang mga senior citizens nga mas nagkinahanglan sa maong tabang, sama sa mga naglubog na nga mga masakiton.