Edad di babag sa pagpangalagad

Ubay-ubay ang misaway ning paglansar ni Hon. Eduardo ‘Eddiegul’ R. Gullas isip kandidato sa pagka-mayor sa Talisay City sa iyang edad nga 80 na kapin. Tingali, wala na sila’y laing nakitang apan sa pagkatawo ni Eddiegul, kinsa nabantog sa iyang pagkakugihan mohimo’g proyekto nga alang sa kaayohan sa tanan.

Usa ka butang nga akong ikahulagway kang Eddiegul mao ang iyang pagka-Diyosnon. Kun ang mga ordinaryong tawo o ubang adunahan, kinsa naukopado sa ilang dinagkong negosyo, wala’y higayon nga mogahin bisa’g usa ka oras lang sa pagsimba kada Domingo aron makig-estorya sa Ginoo, ang pamilyang Eddiegul bisa’g laing adlaw mosimba.

Niadto lang Oktubre 12, 2015, nakita ko si Eddiegul nga misimba sa alas 6:30 sa hapon nga misa. Sa wala pa magsugod ang misa, miluhod na siya atubangan sa altar ug nag-ampo dala ang usa ka prayer book nga iyang gitamdan.

Tapos sa misa, nag-kob among mga palad, diin may gihangyo siya nako: “Tabangi ko ninyo’g ampo ha, nga hatagan ko’g igong kusog ug maayong lawas aron makapadayon ko sa pagpangalagad sa katawhan.”

Natandog ko sa gisulti ni Eddiegul. Sa iyang edad nga 80 kapin na, imbes mopahulay na sa pagpanerbisyo, namarayeg lang gihapon sa kahitas-an nga unta sumpayan ang iyang kabaskog aron ipadayon ang iyang pagpangalagad sa publiko.

Gisundan ko’g tan-aw si Eddiegul dihang mihawok siya sa tiilan ni Mama Mary. Wala’y usa nga miagak niya. Wala gani siya’y sungkod. Timaan nga may kalig-on pa iyang mga tuhod nga andam mosagubang sa tahas nga gusto niyang humanon samtang buhi pa siya ning kalibotan. Ang nakanindot, kay sharp pa kaayo ang panghunahuna ni Eddiegul.

Gani, miingon man siya nga ang Lagtang Public Market nga giayran sa mga Talisaynon, iyang himuong National Sports Training Complex o Commercial Training Ground nga makatabang paghatag og kapanginabuhian sa katawhan. Kana kun siya maoy himuong mayor sa mga Talisaynon ning umaabot 2016 nga piniliay. Mao nga nakaingon ko, nga dili diay babag ang dakong edad diha sa pagpangalagad.