Last will nga gibilin, balido ba?

Dear Atty. Divine,

Ang akong uyoan namatay. Wa siya’y anak ug wa ‘sab siya maminyo.  Sa dihang namatay si tiyo, miingon ang usa nako ka iyaan nga nagbilin kuno kini og Last Will and Testament. Wa niya gipakita kanamo ang maong Last Will apan matud sa akong iyaan nga siya daw ang gibinlan sa tanang property sa among uyoan. Gani karon siya na ang nag-occupy sa balay sa akong uyoan, hasta sa mga kabtangan. Ang akong pangutana kun balido ba kadtong maong Last Will and Testament? Mahimo ba nga angkunon sa akong iyaan ang tanang property nga kabilin sa akong uyoan? Unsa’y angay namo nga buhaton aron among masayran kun tinuod ba nga siya ang gibinlan sa kabtangan? — Angie

Dear Angie:

Kun tinuod nga adunay Last Will and Testament nga gibilin ang imong uyoan ug ang imong iyaan maoy gibinlan sa tanan niya nga kabtangan, dili kana automatic nga mapatuman kay ang Last Will and Testament kinahanglan pa nga ipa-probate kon paaprobahan sa Korte. Atol sa pag-probate sa Last Will ngadto sa Korte, diha nato mahibaw-an kun balido ba kini ug kun nasunod ba ang mga rekisitos sa balaod alang sa balido nga Last Will and Testament. Atol sa pag-probate sa Last Will  kinahanglan ‘sab nga ipresentar ngadto sa korte ang mga testigo nga mopamatuod nga ang imong uyoan ang nagpirma sa Last Will ug kun anaa ba siya sa hustong panghuna-huna sa diha nga iya kining gipirmahan. Busa ang maayo ninyong buhaton mao ang pagpasaka og reklamo ngadto sa barangay batok sa inyong iyaan nga mi take-over sa kabtangan sa imong uyoan aron kamo mag-atubang sa barangay ug mapugos siya sa pagpakita sa Last Will sa imong uyoan. Kun adunay Last Will angay nga iya g’yud kana nga ipa-probate sa korte ug atol sa probate proceedings mahimo ‘sab kamo nga makapasaka og opposition, ilabi na kun nagduda mo sa maong Last Will. Thanks and God Bless. - Atty. Divine