Traffic sa SRP

Niadtong Septiyembre 5, Sabado sa gabii, puwerte’ng taasa sa traffic sa Cebu South Coastal Road diha sulod sa South Road Properties.

Ang hinungdan mao ang gipahigayon nga color run night nga gipasiugdahan sa Manila color run. Gisirad-an ang mga lane alang sa mga sakyanan gikan sa habagatang Sugbo nga mosu’d sa tunnel ug gipagawas sa Plaza Independencia.

Ang mga sakyanan nga gikan sa habagatang Sugbo nga miagi sa Coastal Road nga nakahinayak na pagsulod sa SRP kay wala masayod sa pagsira sa agianan, gipaliko pa-desilya diha duol sa SM Sea Side paingon sa Mambaling.

Apiki kaayo ang agi-anan tungod kay may gitrabaho tunga sa dalan busa hinay ang pagpuli-puli sa pagpalusot sa mga sakyanan. Daghan sa mga motorista nagbagulbol tungod sa ilang pagkatanggong.

May mga traffic enforcer man nga gipakatap apan gamay ra. Kapin lima ka oras ang pagkabara sa trapiko diha sa SRP tungod sa gipahigayon nga night run.

Apan dili kay kadto ra ang labing una nga higayon nga nabara ang trapiko diha sa Cebu South Coastal Road. Ang problema diha sulod sa SRP kay wala’y laing kalutsan ang mga sakyanan nga matanggong.

Kun kaniadto nga lima ka tuig na ang nilabay hawan, lapad ug hamugaway agian ang CSCR isip alternatibo nga agianan sa mga motorista nga molikay sa traffic sa N. Bacalso Avenue (kanhi Cebu South Road) karon dili na ingon niana ang sitwasyon.

Mosamot pa g’yud unya kun magsugod na sa pag-operate ang SM Sea Side, ang Fil-Invest ug uban pa nga establisemento nga tukoron diha sa SRP. Tingali mura na lang og tren ang mga sakyanan nga moagi sa CSCR.

Apan gawas sa napanglantawan nga kahuot sa traffic sa CSCR, laing kahuot ang posible nga masinati unya kun ang kasamtangan nga hitsura sa SRP mao ra gihapon ang makita sa pagpanuyhakaw na sa mga patigayon.

Wala kay makita nga daghang naplastada nga mga infrastruktura sa agianan, gawas lang sa lutsanan sa Barangay Mambaling. Kun pasudlan na unya sa mga PUJ ang SRP aron kaserbisyohan ang mga sumasakay nga moadto sa SM Sea Side nga gitakdang mag-soft-opening sa hinapos nga bahin ning tuiga, asa man unya sila molusot nga dili makabalda sa mga sakyanan nga moagi sa nasudnong highway sa CSCR?

Gawas sa mga karsada natarong na ba usab pagkaplastada ang ubang infrastruktura sama sa drainage ug sewerage systems ug parking area?

May pipila nga nagsugod na sa pagpuyo sa mga condo units nga gitukod diha sa SRP nga nagbasol na kay samtang nihit pa ang mga taxi ug publiko nga sakyanan nga ilang masakyan, wala sila’y klaro nga parking area.