Kasikas sa politika

Usa ka department head ni Mayor Michael Rama modagan pagka konsehal sa dakbayan sa Sugbo, apan adto siya sa kampo sa Bando Osmeña Pundok-Kauswagan (BOPK).

Ang tinuod, si Engr. Randy Navarro, pangulo sa City Community Environment and Natural Resources Office (CCENRO), nagtinguha g’yud nga sa Team Rama siya molansar.

Apan wala man siya maapil sa shortlist sa Team Rama mao nga gikuha siya sa BOPK. Matud ni Engr. Navarro nga gusto g’yud siya nga moserbisyo sa katawhan isip politiko mao nga mo-avail siya og optional retirement.

Nindot bitaw ang pagserbisyo sa katawhan, apan ang nakadaot lang kay adunay mga botante nga dili makaila kun kinsa ang kandidato nga sensiro moserbisyo.

Na hala, paninguha g’yud og maayo sir!

* * *

Sa Mandaue, mas nindot kun modayon si Kongresista Luigi Quisumbing sa pagdagan pagka mayor kontra ni Konsehal Lolypop Ouano-Dizon.

Maisip nga ang ilang sangka ni Luigi ug Lolypop “David ug Goliath.” Sa tinuoray nga David ug Goliath, ang gamay maoy nakadaog. Sa ilang sangka ni Luigi ug Lolypop, kuyaw nga masubli ang kasaysayan.

Si Lolypop gud, pinangga sa katawhan sa Mandaue tungod kay maayo kini og batasan. Dugay na kaayo mi nga nagkita si Lolypop apan kun magkita mi, mohangop g’yud na siya.

Kini usab maoy sentimento sa katawhan sa Mandaue nga akong nahinabi. Mao kana ang angay’ng usbon ni Luigi sa iyang batasan nga di kaayo suod sa mga kabus.

Adunahan og kabanay sila si Lolypop kay apo baya siya sa karaang mayor nga si Ingko Pedong Ouano, apan matinagdanon kaayo si Lolypop.

* * *

Kun gipilde man ni Mayor Johny V. Delos Reyes si kanhi mayor Eddie Gullas, niining subli nila nga panagsangka kinahanglang maningkamot g’yud si JVR.

Sigurado ko nga si Eddiegul dili na mokumpiyansa sa ilang subli nga panagsangka. Sama ra ni kanhi kongresista Tomas R. Osmeña nga human gipilde ni Mayor Michael Rama makig-return bout.

Ang subli nila nga panagsangka maoy giisip nga kulba-hinam kaayo kay ang mga tang-an nga challenger dili na man g’yud na mosugot nga mapilde pag-usab.

Ambot kaha sa Toledo, wala pa ko’y inpormasyon kun magpapili ba pag-usab si Mayor Sonny Osmeña. Sa pagka gobernador, mipahibalo na g’yud si Atty. Winston Garcia nga siya ang moatbang ni Gobernador Junjun Davide III.

Gihulagway sa uban nga lig-on si Winston mao nga kinahanglan nga dili mokompiyansa niini si Davide.