Gasang gituyo pagguba

Samtang nagbasa ko sa The Freeman kagahapon, matud sa balita nga adunay mga mananagat nga motuyo gayud pagguba sa mga gasang diha sa kadagatan.

Kalit lang mipasunding sa akong kaisipan kadtong nasaksihan nako atol sa akong kabatan-on. Daplin sa dagat ang among balay sa Lambusan, San Remigio, amihanang Sugbo ug usahay mouban ko sa among silingan sa pagpanagat.

Tinuod g’yud. Human ikalalad sa mga mananagat ang pukot sa kabatoan nga bahin ilawom sa kadagatan mga duha o tulo ka dupa ang giladmon, tuyoon g’yud pagdumbol ang mga bato ug gasang aron ang mga isda mahadlok ug morumbo sa pukot.

Ang rason niini, ang mga mananagat kuwang og kahibalo nga ang ilang gihimo makapuo sa mga isda kay ang kuhaanan nila og pagkaon giguba na man. Alang sa mga mananagat, ayaw na ninyo kini himoa.

* * *

Kami nga mga sakop sa media, padayon nga naghisgot kun kinsa g’yud kaha ang molansar isip bise       nila ni DILG Secretary Mar Roxas ug ni Vice President Jejomar Binay.

Unsaon nga si Senador Grace Poe mura man og lubi, gusto nga magpalugit. Kun ako pa ni Mar, mangita na lang siya og lain nga mahimo niya nga bise ug haum kaniya mao si Davao City Mayor Rodrigo Duterte.

Abi ninyo og ngano nga nindot nga magpares sila si Roxas ug Duterte? Pareho sila nga walay mansa ang kadungganan kabahin sa graft and corruption.

Pareho usab sila nga may kasinatian na sa pagpadagan sa usa ka kagamhanan, samtang si Grace Poe misikat lang kay anak lagi og artista.

Apan kun dili gamiton ni Grace ang apelyido nga Poe ug maoy gamiton niya ang Llamanzares nga apelyido sa iyang bana, ambot og modaog ba siya.

Dili g’yud unta magpalabi si Grace sa iyang gibati. Nasayod siya kun asa ra kutob ang iyang katakus sa pagka karon. Magtuon usa siya sa pagdumala sa kagamhanan, dili kay mangambisyon dayon nga mahimong presidente.

* * *

Mahimuot g’yud ko maminaw sa kumentaryo sa radyo kay si Konsehal Emmarie “Lolypop” Ouano-Dizon sa Mandaue mura’g hinog nga prutas, gitabangan paglabay kay daghan ang gusto nga mokaon.

Dili ingon niini ang ubang mga dumadagan pagka mayor. Naabot sa akong huna-huna nga hulga man gud si Lolypop ni Kongresista Luigi Quisumbing mao nga gitabangan siya’g atake ug bisan unsa na lang ang pamasangil.

Ang among reporter sa Mandaue nga si Romy Limpangog mitug-an g’yud nako nga kusog si Lolypop sa mga lumolupyo sa Mandaue. Para nako, ang paghimo og pasangil nga wa’y basehanan, moresulta nga wala na g’yuy motuo sa nagpasangil.