Ihiklin na ang pabuto

Kaniadto sa batan-on pa ko, hilig kaayo ko magpabuto og mga rebentador. Gawas nga hatagan ko kaniadto sa magtiayong Julian ug Grace Pungasi, ang ilado kaayo’ng tighimo og mga pabuto sa Barangay Babag 2, Lapu-Lapu, mopalit pa g’yud ko.

Tuyo nako nga dili ko mahutdan sa mga pabuto ug nga inigkahurot na sa mga pabuto sa akong mga silingan, ako na lang ang magpabuto. Usa sa paborito nako mao ang sagad ihatag ni Grace ug Julian kaniadto nga “Pailaw,” kanang hayag pa sa adlaw kun mosiga na.

Miundang na ko pagpamalit og pabuto. Magsalig na lang ko kun hatagan nila ni Grace ug Julian. Paglabay sa mga tuig, wala na ko hatagi og pabuto mao nga naanad na lang ‘sab ko ug wala na mahilig sa kanhi nako pagabuhaton atol sa Pasko ug Bag-ong Tuig.  Maihap na lang sa tudlo ang mga nabuthan og rebentador sa miagi’ng pagsugat sa Pasko. Makapalipay kini nga balita kay nagpasabot nga anam-anam na nga gibiyaan ang kinaiya nga bisan og walay kuwarta, mopalit lang g’yud og pabuto. Kun may kuwarta mo, ipalit na lang og pagkaon kay malipay pa ang inyong pamilya nga mabuhong sa pagkaon. Kini maoy himoa sa pagsugat nato sa Bag-ong Tuig.

* * *

Apan kun simbako, dunay mga trahedya nga mahitabo atol sa nagsingabot nga pagsugat na usab nato sa Bag-ong Tuig, ang kapolisan gihatagan og kamandoan sa National Police Commission (Napolcom).  Si DILG Secretary Mar Roxas nga maoy chairman sa Napolcom, mimando sa kadagkoan sa Philippine National Police (PNP) nga magmugna sila og team nga tahasan sa diha-diha nga pagresponde sa mga trahedya.

Si Roxas mipahinumdom ni Chief Superintendent Danilo Constantino, ang direktor sa Police Community Relations sa Camp Crame, nga kun may trahedya angay’ng anaa g’yud dayon ang kapolisan.

Husto ang gihimo ni Roxas kay dunay mga sitwasyon sa nangagi’ng pagsaulog sa Pasko ug Bag-ong Tuig nga ang kapolisan dugay kaayo nga nakaresponde kay ang mga polis nag-party ug pipila ra ang gibilin sa ilang police stations.

Isip chairman sa Napolcom, si DILG Secretary Roxas may katungod sa pagpahinumdom sa kapolisan nga dili sila makalimot sa ilang mga katungdanan.