Andam motabang

Sa inyo na’ng nasayran, kapin sa 500 ka senior citizens sa Capitol Site ang mipadayag sa ilang pagsupak sa gilaraw pag-donate og portion sa ilang cash assistance alang sa pagtukod sa bag-ong Cebu City Medical Center (CCMC) building.

Ang OSCA naglaraw unta pag-donate og P120 milyones, gikan sa P720 milyones nga gahin alang sa cash assistance sa mga 60,000 ka senior citizens dinhi sa dakbayan.

Sa ato pa, ang P12 mil nga cash assistance sa matag senior citizen, ibanan og P2,000, alang sa tukoron nga CCMC.

Nindot ni nga ideya. Apan alang sa pipila ka senior citizen, mora kuno ni’g programa sa telebisyon nga HATAG-BAWI, tungod kay ang cash assistance gikan man sa City Hall, ug karon portion niini bawion alang sa proyekto sa dakbayan.

Ug alang sa kabus nga mga senior citizens, sakit kaayo kun bawian ka’g salapi ug bisan unsa nga butang. 

Nalipay kita nga si Mayor Michael Rama namahayag nga samtang usa kini ka dalaygon nga buhat sa mga senior citizens, apan, dili siya buot nga himuon nga compulsory. Dili pinugsanay, kondili, voluntary.

In fairness sa mga senior citizens, willing sila, willing kami pag-donate, labi na kun kahatagan kami’g luna, sulod unya sa bag-ong hospital, usa ka geriatric ward, exclusively for the senior citizens.

Apan, voluntary, ug walay kantidad nga isitar. Sa ato pa, inigpanghatag unya sa balance nga P5 mil, mahimo nga mo-donate kami’g P200, P500, P1,000, ug kadto’ng dili kaayo lawom og bulsa, maka-afford, ug hilabihan ka manggihatagon, mahimo nga mo-donate sila’g P2 mil.

Gisugilon sa Bibliya nga mas nahimuot ang Ginoo sa usa ka pordoy nga mi-donate og usa lang ka peso, kay sa niadtong mga adunahan nga mi-donate og linibo.

Ang usa ka peso, alang sa pordoy, gikan kadto sa kasingkasing, samtang ang linibo gikan sa mga adunahan kaayo, gikan sa pork barrel. (Duna na bay pork barrel sa unang panahon?)

Mao nga mayor, majority sa kapin sa 60 mil ka senior citizens sa dakbayan, mga pordoy, ug ang P200 nga among ma-donate ngadto sa CCMC, magagikan kini sa among kasingkasing.

Usa ka halangdon ug dungganan nga buhat, alang sa mga senior citizens nga mahimo sila’ng kabahin sa mga malumo og kasingkasing nga nakatampo pagtukod sa CCMC.

At least, inigbarog unya sa hospital, makaingon kami sa among kaugalingon nga “usa ako sa nakapabarog sa maong hospital.” Nindot ang atong feeling. Apan, ayaw lang i-compulsory.