Magpatulis gihapon mo?
Pasirad-an ni Mayor Michael Rama ang pipila ka sangang buhatan sa LBC Express nga wala’y guwardiya kay makapadani kini sa mga tulisan.
Daghan ang nagduda kon gituyo ba sa tag-iya sa LBC Express o kaha wala’y kasayoran niini ang tag-iya ug kabubot-on ra sa iyang local managers nga dili mokuha’g guwardiya. Unsa may tuyo nga dili mokuha og guwardiya? Aron ipatulis?
Wala’y laing depensa ang mga establisemento gawas sa security guard, CCTV, ug sa iyang mga kawani.
Apan kon ang gipang-instalar ninyo nga CCTV dili maayo og quality, aw wala’y kapuslanan, sama sa CCTV sa Avon branch sa Tabunok, Talisay nga gumikan sa kahanap sa kuha niini, wa maklaro ang dagway sa mga tulisan nga mipatay kang Ramil Buno, ang security guard sa maong tindahan.
Gimandoan ni Mayor JVR ug sa kapolisan sa Talisay ang tag-iya sa Avon nga pailisan ang ilang CCTV o kaha usbon ang pag-instalar niini aron nga maklaro ang dagway sa mga tawo nga ma-capture sa camera.
Ambot ngano kaha nga wala man kini ma-adjust sa manager, siyaro kon wala g’yud niya tan-awa ang footage sa CCTV matag semana aron pagsuta kon klaro ba ang quality o dili?
Gimandoan na ni CPPO Director Noel Gillamac ang hepe sa kapolisan sa Talisay nga ilhon ug dakpon ang mga tulisan nga mipatay sa guwardiya sa Avon sa Tabunok.
Una nga higayon kining nahitabo ubos sa administrasyon ni mayor JVR, ug naglaum ang kadaghanan nga dili na unta kini mausab pa.
Kining tanan mag-agad sa alerto nga pagdumala sa mga mayor ug ang kamatinumanon sa publiko sa balaod kay way manulis nga tulisan kon wala’y mga tawo nga magpatulis.
* * *
- Latest
