EDITORYAL - Nganong sikat si PO1 Roa

Nag-trending ang hulagway sa usa ka pulis nga mitabang og ilis sa na-flat nga ligid  sa sakyanan sa usa ka 72-anyos nga motorista sa Facebook sa miaging mga adlaw. Gani, miabot na sa national TV kining gibuhat sa pulis.

Ang pulis mao si PO1 Mark Wilson Roa. Ang iyang gitabangan, nga mao pud ang mi-upload sa hulagway sa Facebook, mao si Orlando Enoveso.

Daghan na kaayong shares ang hulagway sa rookie cop ug aduna nay plano nga pasidunggan kini, apan duna gihapo'y mga tawo nga nangutana nganong himoon man nga big deal ang pagtabang ni PO1 Roa kang Mr. Enoveso.

Nganong sikat si PO1 Roa ug nganong big deal ang iyang pagtabang?

Una, sa panahon karon nga bati ang imahe sa kapolisan, ang maong pagtabang ni PO1 Roa sa usa ka senior citizen matawag nga breath of fresh air. Nagmatuod kini nga duna pa gayu'y mga pulis nga tarong ug makapabuhi ni'ng balitaa sa paglaum nga moabot ra unya ang panahon nga matabunan ra ang mga binuhatan sa mga bad cops sa mga binuhatan sa good cops.

Ikaduha, ang trabaho sa pulis, dili lang ang pagsumpo sa krimen, kun dili pagtabang usab sa katawhan. Mao ni ang gitawag nga community service. Sa laing nasud, salig kaayo ang mga tawo sa kapolisan - adto mangayo og directions sa pag-adto og usa ka lugar, sa paglabang sa dalan ug uban pa.

Bisan pa sa iyang kabag-o sa pagkapulis, matawag gyud nga model cop si PO1 Roa. Magpadayon unta ang iyang pagkamaayo ug himoon unta siya nga ehemplo sa ubang mga pulis.