Mga swerte nga biktima ni Yolanda

Makadawat ka og P20 mil isip calamity assistance, bisa’g walay nahimo’ng kadaot sa imong kabtangan, o sa imong kaugalingon.. swerte kaayo ka. Mora ka og nakadaog sa swertres. Akong usbon, P20 mil isip biktima sa bagyo’ng Yolanda … pagka swerte nimo nga typhoon victim.

Apan nangutana ang akong amigo nga silingan sa usa ka kawani sa City Hall kun ngano nga wala man siya maapil sa P20 mil. Ngano nga taga City Hall ra may gibiktima ni Yolanda?

Maayo pa kuno kun giklaro nga Christmas bonus ang kantidad, dili pa tingali ma-question. Apan, matud sa City Hall, legal kuno ang ilang gihimo kay, among others, naguol ang taga City Hall sa maong hitabo.

* * *

Dili automatic nga kun nakadawat ka sa Discretionary Accelaration Program (DAP), kawatan ka na. Samtang gi-declare sa Korte Suprema nga unconstitutional ang DAP, ang labaw’ng hukmanan miingon “What DAP had financed like ongoing road and bridge projects, that were implemented in good faith would not be affected by the program’s nullification.”

Sa ato pa, kun ang salapi gikan sa DAP nga imong nadawat wala mahipunta ngadto sa non-existing nga mga Non-Government Organizations (NGO), ug kun kini gigasto g’yud sa mga proyekto nga makita, ug dili “ghost projects” dili ka maapektohan sa ruling sa Supreme Court.

Si Mayor Gabino Ganggangan sa Sandanga, Mountain Province, miingon nga didto sa Cordillera dugay na nga wala matagad sa una’ng mga administrasyon, ug karon pa kini atimana ginamit ang kwarta sa DAP.

Ang mga lider sa Cordillera People’s Liberation Army (CPLA) nga gitukod sa rebelding pari nga si Conrado Balweg (hinumdom mo?), namahayag nga ang gahin gikan sa DAP, at least sa ilang dapit, “have been well spent and used in good faith.”

So, kadto’ng nalakip sa lista sa mga nakadawat sa DAP, paningkamot mo nga makapakita sa gidapatan sa salapi gikan sa DAP. Otherwise, masikwati g’yud mo.

* * *

Correct si Senador Allan Peter Cayetano sa iyang pag-ingon nga ang decision sa Supreme Court batok sa DAP, nagpasabot nga dako’ng buhi ang demokrasya sa “system of checks and balance.”

Tinuod, kay sa una nga mga administrasyon, atong nakita nga medyo dapig ang Korte Suprema sa Presidente. Apan karon, klaro kaayo nga walay gidapigan ang Judiciary. Atong nakita nga independent gayud ang Judiciary gikan sa Legislative ug sa Executive departments.

Malacanang may have lost the battle, but they have won the war, matud ni Cayetano, kay lagi, atong nakita ang independence sa tulo ka branches sa gobiyerno. Sa ato pa, mitahod si Noynoy sa Supreme Court, ug wala siya’y tinguha pagdiktar niini, bisan kun ang Chief Justice iyang tinudlo.

Karon, gumikan sa Supreme Court ruling, ilang ipa-impeach si Noynoy. Mo-prosper kaha ni? Duna ba kaha kini’y support sa katawhan, o sa opposition lang?