Ang kuripot nga himsog

Haskang lipaya sa akong suod nga higala nga nakabasa sa atong lindog kay may numero man sa akong selpon busa mitawag kini nako. Sukad gud mi-graduwar kami sa kolehiyo, wa na mi koneksyon ilabi na nga didto na ni siya manarbaho sa abrod sud sa 30 ka tuig. Miasoy kini nga pabisitahon ko sa ilang pinuy-anan didto sa bukirang bahin ning atong dakbayan sa Sugbo.

Dihang nakahigayon ko, nagsakay ko’g motorsiklo paingon sa dapit segun sa direksyon nga gihatag kanako. Nagdula sa akong panumdoman nga sapian na gyud ang kahimtang niini. Kay sayud ko sa hilabihang kalisud ning akong higala. Kaniadto, kay lagi apiki kaayo permi ang kita niya sa pangarga sa pantalan, mamarayeg tawon ni nako sa iyang kaapiki kay duol ra man sa piyer ang opis ko. Pag-abot na ko sa ilaha, wala ko magtoo nga ingon niadto ang akong nakita sa palibot. Ang ilang balay hinimo lang tanan sa kawayan gawas sa atop nga kugon, pero nindot pagkahimo. Dihang naniudto na mi, gidalitan ko’g sardinas kay kuno maikog sila nako kay ang giluto nga sud-an pulos kamungay nga utan. Unya may lutong mais, kamote, balanghoy ug hino’g nga saging diha sa lamesa.

Nasayran nako sa among panag-estoryahay nga may dako siyang baboyan ug manokan (piggery & poultry) ug mga yutang napalit nga giduma sa mga anak nga may lainlaing produkto sa agrikultura. Ug may mga kondo yunit nga gipang-abangan. Matud sa akong higala, gusto niya ang yano nga kinabuhi, bisan pa man makahimo siya pagwaldas sa salapi aron pagtagbaw sa kaugalingon.

“Oo kuripot ako sa butang nga way kapuslanan,” matud pa niya, “ apan dili usab ako magmakuli sa pagtabang sa  uban.Wa sab nako papatuyangi sa luho ang lawas kundi igo ra usab kun unsay makaayo sa panglawas maoy giatiman ko aron maangkon sa kanunay ang kahimsog nga mopataas sa atong kinabuhi.” Malipayon siya sa bukid nga naghandum sa iyang nasinating grabeng kalisdanan.

Nagpanlingo kong nahimuot sa akong higala kay niya pa, mas swerte kuno ko kay bisa’g wa koy igong salapi, apan daghan ko’g kahibalo nga gipamahin sa mga magbabasa aron makabaton sila’g paglaum sa kinabuhing puno sa pagsulay. May sobre siyang gihatag kanako, abi ko ba’g kuwarta usa diay ka time deposit certificate nga makuha lang ighuman sa tulo ka tuig. Mao ni kuripot nga di tihik.