Pasundayag ni Bong

Tataw ang tumong ni Senador Bong Revilla sa iyang gihimong pamahayag sa Senado. Kana kung aduna siya’y uwaw.  Ang pagkuha sa simpatiya sa publiko mao unta ang iyang intensyon sa ‘salamat kaibigan’ speech.

Apan ang nakapait, wa’ malipay ang publiko sa iyang gihimo. Inay mosimpatiya, naglagot, gisaway ug gidukdok si Revilla sa iyang nahimong pamahayag.

Natural lang ang maong reaksyon sa mga tawo nga dugay nang nagsunod ning kontrobersiya sa pork barrel ug nagpaabot nga mopahawa sa katungdanan ang mga senador nga gilambigit sa maong isyu. Apan dili resignation ang gihimo ni Revilla kun dili salida nga wa’ mahaom sa lugar ug panahon.

Ang Senado, isip institusyon usa unta ka sagrado’ng dapit sa mga magbabalaud kansang tumong mao ang paghatud sa tingog, reklamo ug yangungo sa mga tawo diha sa grupo sa mga senador. Ang ilang tahas mao ang pagpanday og mga balaud nga maoy makahatag og tubag sa problema sa publiko.

Apan ning bag-ong henerasyon, ingon sa nahatagan og ngil-ad nga tumong ang maong institusyon. Giabuso ang maong sagrado’ng dapit sa unta mga respetado’ng magbabalaod. Gikan sa usa ka senadora nga nisayaw atol sa impeachment ni kanhi presidente Joseph Estrada hangtod ning gihimo karong pasundayag ni Revilla.

Usahay mouyon ‘ta sa mga pamahayag ni Kris Aquino.  Alang niya, mas maayo pang mohilom na lang kaysa motingog ug mosalida tunga-tunga sa mga akusasyon. Apan daw wa’y nakatambag ni Revilla nga ang pagpakahilom mas lanog pang pamahayag sa pagka-inosente sa isyu itandi sa pagsaba-saba ug paghimo og mga lakang nga maoy makapasamot sa pagduda sa katawhan. 

Nagtuo man gud ‘tang bombshell na gyud ang iyang pamahayag sa Senado ug kana mao ang pagluwat na sa katungdanan.  Di’ nato malimtan ang gihimo kaniadto ni Migs Zubiri nga nihatag sa iyang emosyonal nga speech. Apan sa kauwahian nga bahin, nanamilit ug nagpasalamat. Si Revilla pulos pagpasalamat ang gihimo ug wa’y laing bug-at nga unod ang iyang pamahayag.

Ang labing dakong sayop ni Revilla mao ang iyang paghagit sa presidente nga tutukan ang mas dagkong problema sa nasud sama sa kakabus ug edukasyon ug uban pa nga dagkong proyekto ang atimanon.  Nakalimot si Revilla nga ang labing dakong problema sa nasud nga dugay nang gireklamo sa publiko mao ang grabeng kurapsyon.

Nagtuo ang katawhan nga kung malimpyo lang ang gobiyerno gikan sa pangurakot, masulbad na ang kakabus ug mosunod ang mas paspas nga kalamboan. Nakalimot si Revilla nga ang gihimong paglimpyo sa mga institusyon sa gobiyerno gikan sa kurapsyon ang labing mahinungdanong rason ngano nga adunay taas nga approval rating ang administrasyong Aquino.

Wa’ gyuy nakatambag ni Revilla nga samtang iyang gihagit ang presidente nga mohimo og mga landmark projects, mas naduot ang iyang pagkatawo sa mas bulingon nga bahin sa katilingban. 

Samtang giyawyaw ni Revilla ang iyang mga reklamo sa gobiyerno, mas iyang gikaligo ang buling sa iyang kaugalingon hinungdan nga napakyas siya sa pagkuha sa simpatiya sa masa.  Mentras aduna pa’y taas nga approval rating ang presidente, bisan kinsa nga mokontra ug mosaway sa iyang pagpadagan sa gobiyerno maoy sad-an ug bulingon sa mata sa katawhan.

Wa’ gyuy nakatambag ni Revilla nga di’ mahimong madani ang kasing-kasing sa mga tawo pinaagi sa kanta ug apilar sa emosyon. Human na ang punto nga madani sa drama ang katawhan tungod kay mas sibaw karon ang tinuod nga senaryo—adunay binilyon ka pesos nga giwaldas nga PDAF ug adunay mga opisyal sa gobiyerno nga gilambigit sa maong isyu.

Ang labing maayong buhaton niini nga mga senador ug uban pa’ng mga opisyal sa gobiyerno nga gilambigit sa isyu mao ang pag-atubang sa sumbong ug paghatag sa ilang habig sa tukmang lugar ug panahon--- di’ ang pag-drama sa senado o kongreso.  Sa maong paagi, madayeg pa sa katawhan ang ilang pagka ‘honorable’ ug pagka ‘stateman’. Ang kakuwang sa uwaw ang labing dakong problema sa atong mga opisyal sa gobiyerno karon. Sa pagdagan sa panahon, eksperto na sila sa paghimo og mga salida ug pasundayag nga inay mosalbar sa ilang dungog—karon hinay-hinay nga nipukan sa ilang bansagon.

Email: [email protected]. or [email protected].