Kaluoy alang sa mga trabahante ug mga LGBT

Ang P13 nga “kaluoy” sa sektor sa management usa lamang sa timailhan nga ang gobyerno wala na gyuy tagad sa kahimtang ug katungod sa mga trabahante sa nasud.

Ang desisyon sa Regional Tripartite Wages and Productivity Board (RTWPB) nga P13 isip usbaw dili sa suweldo kun dili sa “cost of living allowance” (COLA) sa mga trabahante, usa ka desisyon nga mismo sila maulaw maghunahuna nganong ingon ra ka gamay.

Bisan hinuon og unsaon og siyaok sa sektor sa pamuo (labor), kanunay silang alkanse sa botasyon sa RTWPB kay sa duha nila ka botos, lupigon sa duha ka botos sa representante sa management kon employer. Samtang sa tulo ka representante sa gobyerno nga gikan sa National Economic and Development Authority (NEDA) ug Department of Trade and Industry (DTI) ug Department of Labor and Employment, kanunay silang mobotar pabor sa management.

Sa kasaysayan sa RTWPB-7, wala pa ko makahinumdom nga ang NEDA ug DTI mibotar pabor sa gipangayo sa mga trabahante.

Ang DOLE mobotar lamang kun adunay patas (tie) nga resulta sa botasyon.  Dili kita makapaabot nga mopitik ang kasingkasing sa mga representante sa DTI ug NEDA pabor sa mga pobreng trabahante kay kining mga pobreha dili makakuyogkuyog niya ug sa panahon sa ilang birthday, dili sila makahatag kanila og inasal ug mahalon nga mga gasa.

Mao kini ang nakadaot dinhi sa Pilipinas, ang mga pordoy mosamot og kaut-ot tungod kay walay gobyerno nga nag-guwardiya sa ilang katungod kay tua nakig-abin sa mga adunahan nga maoy kanunay nilang ikakuyog sa mga tapok-atpok, kaon-kaon, katawa-katawa ug party-party.

Akong hagiton si DTI-7 regional director Asteria Caberte sa pagsubay sa mga Sugboanong mga trabahante sa mga panahon nga kini naluoy sa ilang kahimtang ug mibotar pabor sa mas taas-taas nga usbaw sa suweldo, dili lamang kinaluoy. Wala gyud!

Ang NEDA mao untay gitahasan nga mopresentar sa RTWPB og mga pagtuon aron matugkad ang kinahanglanon pagpa-usbaw sa suweldo sa mga trabahante, mopresentar hinuon og pagtuon nga magtug-an kunohay sa alkanse sa mga trabahante.

Nasayod ang NEDA nga ang mga tawo dili motuo sa ilang pagtuon nga gituyo pagkondisyon sa utok sa mga tawo nga alkanse ang mga negosyo. 

Unsaon man pag-alkanse kun ang mga negosyante kanunay’ng nagpa-uraray sa gawas sa nasud nga ang gasto gikan sa ginansiya sa ilang negosyo? Unsaon nato pagtuo sa alkanse nga makapamalit man og mga kabtangan, yuta ug makatukod og mga edipisyo alang sa expansion o branch out sa ilang negosyo?

Dinhi nahagbong ang gobyerno sa ilang trabaho pagseguro sa katungod sa mga trabahante - samtang estrikto ang gobyerno paglili ug pag-regulate sa suweldo sa mga trabahante, dili kini estrikto paglili sa libro sa mga negosyante pagseguro nga adunay igong porsiyento niini nga itagana sa saktong suweldo ug sa paghatag og usbaw alang sa mga produktibong mamumuo.

Mao kini ang hinungdan nganong adunay daghang militante nga kanunay’ng nagmartsa sa kadalanan tungod kay ang gobyerno walay kasingkasing alang sa mga trabahante kun hisgotan ang ilang mga benepisyo sa ilang pagpanarbaho.

* * *

Mga nagkalainlain nga grupo miawhag sa konseho sa dakbayan sa Sugbo sa pagpasar sa ordinansa alang sa kahimuan sa Anti-Discrimination Commission sa dakbayan.

Sumala pa sa balita kagahapon sa The Freeman, ang maong commission moprotehir  ug mo-monitor sa komunidad ug ‘welfare’ sa mga tomboy, bayot, bisexual ug transgender nga gitawag og “LGBT.”

Ipatig-uyon kini sa City Ordinance No. 2339 niadtong 2012 nga magsilot ni bisan kinsa nga mohimo og bisan unsang klase sa diskriminasyon batok sa mga persons with disabilities (PWDs), mga tawo nga adunay sexual orientation ug gender identity, ethnicity, edad, estado sa panglawas ug relihiyon. Tuyo sa maong ordinansahon nga gipasar nilang   Konsehal Margarita Osmeña, Leah Japson ug Alvin Dizon nga maundang na ang diskriminasyon ug aron matabangan nga mahatag ang respeto sa mga LGBT ug mo-promote og peaceful coexistence sa mga sama nila ug sa mga dili sama nila.

Apan gamay’ng punto lang alang sa mga author niining maong ordinansahon: tun-i ninyo ang mga insidente sa barangay ug nganong adunay mga kaso sa diskriminasyon.

Makahisgot ko niini tungod sa akong obserbasyon nga adunay mga LGBT nga imoral og lihok, hinuon akong klarohon nga dili silang tanan.

Adunay mga bayot nga hilabihan kaki-at, hilabihan ka-bastos, hilabihan ka-hilabtanon ug labaw pa sa babaye kun makakita og lalis. Mao kini kasagaran sa mga rason nganong adunay mga kaso nga paminawon sa Lupon Tagapamayapa.

Maayo unta og matuki usab sa maong ordinansahon unsaon pag-deal sa gobyerno niining mga insidente nga maglambigit sa suliran sa mga yanong tawo nga maoy biktima niining mga LGBT. Nahadlok ang uban nga basin unya og mahimong “protektor” sa mga ilegalista ug imoral nga LGBT kining tukoron nga “commission” ug mahimo nang babag pagpangita sa hustisya. Makaayo kining maong commission aron adunay proteksiyon alang sa mga dinaogdaog nga mga LGBT. Apan dili kini makaayo kun moprotehir sa ilegal ug imoral nga kalihukan sa mga LGBT.