Politika sa 4Ps
Dugay na ko'ng nakadungog sa pagpahimulos sa ubay-ubay nga mga politiko sa daghang mga kahugpongan nga angayan untang dili ilakip sa pamolitika.
Kadaghan na sab nako nadunggi ang kanunay nga pagpamalibad sa mga ahensiya ug mga opisyal nga hingtungdan.
Usa sa mga organisasyon nga gikabay-an sa mga politikong baga og nawong mao ang grupo sa mga beneficiaries sa Pantawid Pamilyang Pilipino Program kon 4Ps sa nasudnong kagamhanan.
Ang maong programa gipiyal sa national government ngadto sa Department of Social Welfare and Development kon DSWD.
Buot ipasabot niini wala gyu'y labot ang lokal nga mga opisyal sa programa.
Apan dunay mga politiko'ng mangingilad nga mangangkon sa programa ug manghulga sa mga membro sa 4Ps nga taktakon isip beneficiaries kun dili mosuporta nila.
Pagkawala gyu'y uwaw, wala lang nila angkona ang programa nga dili ila kun dili giilad pa og apil ang katawhan.
Karon nga hapit na ang barangay elections di kalikayan nga motumaw na sad ang mga politikong mangingilad.
Atong bantayan kay sagad ini nila mga incumbent nga opisyal sa barangay nga manghulga dayon nga taktakon isip beneficiaries kun di mosunod nila.
Ayaw mo pailad niining maong mga matang sa politiko. Kini tungod kay way gahom si bisan kinsang opisyal sa barangay nga mopatangtang ni bisan kinsa nga beneficiary sa programa.
Mamahimo ka lang matangtang niini kun dili nimo sundon ang tanang lagda sa programa ug nakasiguro ko nga way labot niini ang politika. Angayang bantayan og maayo sa DSWD ang pagpatuman sa maong programa nga dili kapahimuslan sa mga politiko'ng tikasan.
Samtang dili nato kabut-an ang matag membro sa kahugpongan sa mga beneficiary sa 4Ps nga mopaluyo og kandidato, apan dili husto nga gamiton ang organisasyon.
Pananglitan, dili husto nga imbitahon ang mga kandidato aron modiskurso atol sa mga tigom sa organisasyon.
Apan dunay daghang grupo sa 4Ps nga akong nahibaw-an nga gigamit sa politika.
Gani dunay uban nga mga nagtinguha nga mopapili pag-usab nga mipatawag gyud sa mga membro sa 4Ps alang sa usa ka tigom didto sa iyang kaugalingon.
Angayan nga kini badlongon sa DSWD aron malikayan nga maduhig sa politika ang usa ka lihitimong programa sa gobyerno.
* * *
- Latest
