Kinsa si Al-Asiri?

Siya ang hinungdan nganong daghang tugpahanan sa Amerika ang nagpahubo sa sapot sa ilang mga pasahero sa di’ pa mosud sa x-ray machine aron masusi kung wa’ ba sila’y bomba nga bitbit.  Si Ibrahim Al-Asiri ang naghimo sa gitawag nga ‘underwear bomb’ nga di’ mahibaw-an sa x-ray machine sa mga airport ug di’ masinghot ang bomba sa mga K-9.  Si Al-Asiri ang labing gipangita karon sa kalibutan ug tungod sa iyang bag-ong mga pamaagi sa paghimo og bomba, giisip siya nga labing delikadong tawo sa kalibutan karon.  Ug mismong si Presidente Barrack Obama ang nagmando nga patyon si Al-Asiri—ang labing peligrosong leader sa gitawag nga Al-Qaeda in the Arabian Peninsula o AQAP.

Niadtong 2009, kauban ni Al-Asiri ang iyang igsuon nga si Abdullah, ilang gisuwayan sa pagpatay si Prince Mohammed bin Naif sa nasud sa Saudi Arabia.  Nagpaila ang manghod ni Al-Asiri nga siya ang mobutyag sa prinsipe sa mga kalihukan sa AQAP, ang labing gikaintapan nga grupo sa tunga-tungang sidlakan gumikan sa ilang mga lakang sama sa pagpamomba.  Gipasakay si Abdullah og pribadong eroplano sa prinsipe gikan sa nasud nga Yemen (ang sentro sa operasyon sa AQAP) aron makigkita sa prinsipe didto sa Saudi Arabia.  Wa’ mahibawo ang prinsipe nga lahi ang tumong sa maong pakigkita.  Sul-ob ang gitawag nga ‘underwear bomb’, gipabuto ning Al-Asiri dihang nag-atubang na ang iyang manghod ug prinsipe.  Apan palpak ang operasyon.  Nadugmok ang lawas sa iyang manghod nga si Abdullah ug nakaangkon lang og gamay nga samad ang prinsipe.

Ning bag-o, gipagawas sa TIME magazine ang mga lakang nga gihimo ni Al-Asiri gikan 2009.  Gihulagway siya nga labing delikadong sakop sa AQAP tungod sa iyang mga nahibaw-an kabahin sa bomba.   Nikuha og kursong chemistry sa King Saud University si Al-Asiri human mamatay sa aksidente sa sakyanan ang iyang usa sa walo ka igsuon.  Si Al-Asiri ug manghud nga si Abdullah ang labing suod hangtud nga nahimong relihiyoso ang duha.  Kini ang gibutyag sa ilang mga ginikanan dihang gipangutana sa mantalaang al-Watan. Apan gumikan sa ilang pagpasakop sa radical nga grupo nga supak sa Amerika, nabag-o ang panlantaw sa magsuon hangtud nga nagpasakop sila sa AQAP.

Ang palpak nga operasyon ni Al-Asiri nga nikutlo sa kinabuhi sa iyang suod nga igsuon nga si Abdullah, nasundan pa niadtong 2010.  Usa ka Nigerian nga si Umar Farouk Abdulmutallab nga sakop sa ilang grupo ang gipasul-ob na ‘sab og underwear bomb.    Sakay sa eroplano paingon sa Detroit,  palpak ang operasyon dihang wa’ mobuto ang bomba gumikan sa grabeng singot sa Nigerian sa lawas.   Gigamitan og syringe ang maong bomba isip detonator.   Tumong unta sa suicide bomber nga pabuthon ang iyang kaugalingon sa di’ pa motugpa ang eroplano sa Detroit.   Apan pakyas ang maong operasyon.   Nakaangkon og mga samad sa lawas ang Nigerian ug gipaubos sa kostudiya sa mga Amerikano.  Didto nila nahibaw-an ang bag-ong imbensyon ni Al-Asiri nga ‘underwear bomb’.

Apan wa’ motalaw si Al-Asiri.  Tuig 2011, giilisan ini ang mga powder printer sa mga computer cartridge og bomb powder.  Gikan sa nasud nga Yemen, tumong unta ni Al-Asiri nga pabuthon ni sa dayon abot sa Chicago.  Apan nahibaw-an sa intelligence team ang maong operasyon.  Pag-abot sa Dubai ug United Kingdom, nasumpo ang duha ka cargo plane nga nagkarga sa maong mga computer cartridge.   Didto nahibaw-an nga mas delikadong bomba ang gipanghimo ni Al-Asiri bisan kung mapalit lang sa internet ang mga sangkap ug mahimo ra ning makuha bisan asa sa baratong presyo.

Sa miaging tuig, laing operasyon ang gihimo ni Al-Asiri.   Usa ka British national nga nagpailang buot magpasakop sa AQAP ug nagbitbit og British passport ang nagpadani ni Al-Asiri.  Tungod kay mas dali ning makabiyahe paingon sa Amerika tungod sa bitbit nga passport, iya ning gibutangan og ‘underwear bomb’.   Wa’ mahibawo si Al-Asiri nga secret agent diay sa FBI ang maong tawo.  Didto mas nahibaw-an ang mga lakang sa grupo ni Al-Asiri tungod sa maong ahente.  Apan karon—bisan sa mga operasyon nga gihimo sa Amerika sa Yemen pagsumpo sa AQAP ug pagpatay ni Al-Asiri, gawasnon gihapon ni ug gikabalak-ang nagplano sa mosunod niyang pagpangatake.

* * *

Email: [email protected]. or [email protected].