Obispo Teofilo: Sa Dios Ikaw nahigugma

Ang mosunod nga mga hilisgutan kinutlo gikan sa Modyul sa kinabuhi ug mga buhat ni Obispo Teofilo Bastida Camomot, DD. Tumong niini mao ang pagpakaylap sa iyang kinabuhi ug binuhatan sanglit, giduso man sa Artsidyosesis sa Sugbo ang kawsa sa iyang beatipikasyon. Atong i-ampo nga mabayaw unta siya sa kadungganan sa mga altar. Sa mga grasya nga nadawat palihog sa pagsulat o pagtawag sa kamadrehan sa Daughters of St. Teresa-Valladolid, Carcar City Cebu sa telepono: 487-9233

Unang hilisgutan

 Ang Kinabuhi ni Obispo Teofilo Bastida Camomot

TUMONG: Imantala ang mga mahinungdanong kamatuoran sa kinabuhi ni Obispo Teofilo Bastida Camomot, DD

Nahimugso si Teofilo Bastida Camomot niadtong Marso 3, 1914 didto sa Cogon, Carcar, sa Habagatang bahin sa Sugbo, sa mga magtiayong Luis Camomot ug Angela Bastida. Aduna siya’y upat ka mga igsuong mga babaye nga sila si Filomena, Hedeliza, Carmen ug Remedios ug upat ka mga igsuong lalaki nga sila si Tereso, Elpedio ug Amado. Ikatulo si Lolong sa mga anak sa ikaduhang kaminyoon sanglit ang iyang amahan biyudo man. Aduna siya’y ubang mga igsuon sa unang kaminyoon ni Luis nga gilangkoban nila ni Padre Diosdado ug Otilla. Usa  ka cantor ang iyang amahan sa parokya ni Santa Catalina sa Alejandria sa Carcar Sugbo ang parokya diin si Teofilo nabunyagan ug gikompirmahan. Nagtubo siya sa usa ka panimalay nga relihiyoso kaayo ug adunay dakong pagtamod sa pagtuong Katoliko. (Sumpayan pa)