Wala magtiaw si Ms. Annabelle Rama

Sa sinugdanan daw giyam-iran lang sa uban ang pagpahibalo ni talent manager Annabelle Rama nga magpapili siya pagkakongresista sa ikaduhang distrito sa dakbayan sa Sugbo.  

Apan sa dihang miduso gayod siya sa iyang certificate of candidacy sa pagka kongresista ug nanguli ang mga sakop sa iyang pamilya nga gilangkoban sa mga inilang artista gikan didto sa kaulohan apil na ang uyab sa iyang mga anak alang sa pagparehistro sa ikaduhang distrito aron mamahimong botante, gipakita ni Ms. Annabelle Rama ngadto sa mga Sugboanon nga wala siya magtiaw sa iyang kandidatora ug solido siyang gisuportahan sa iyang pamilya.    

Gawas nga nagparehistro ang mga anak ug ang bana sa talent manager nga si Ms. Annabelle Rama, ang naulahi nagsige na usab og bisita sa mga tawo sa ikaduhang distrito sa dakbayan sa Sugbo.

Bisan og ang iyang trabaho atoa didto sa kaulohan isip talent manager sa mga sikat nga artista sa television nahimo gihapon niya ang pagpakita ngadto sa mga Sugbuanon nga iyang gisaaran nga alagaran.

Gipakita niya ngadto sa mga Sugboanon nga bisan sa kadaghan sa iyang mga gimbuhaton aduna gihapon siya’y panahon para kanila.

Sigon sa akong nahibaw-an gikan mismo sa mga tawo nga nakasaksi sa mga pulong-pulong nga gitambongan sa talent manager nga si Ms. Annabelle Rama modugok  gayod ang mga tawo ngadto kaniya. Gani matud pa sa mga nakasaksi, ang mga tawo nga nagpuyo sa mga balay nga adunay gibitay nga tarpaulin nga type O mokanaug man aron sa pagpakighimamat ni Annabelle.

Samtang dili garantiya nga ang mga tawo nga mitambong sa mga pulong-pulong nga gitambongan apil na ang mga nakasul-ob og type O nga nakighimamat ni Annabelle Rama mobotar na kaniya pero wala ta masayod kun maagni na ba sila sa pagbotar kaniya ilabi na kun wala silay makitang plastik sa dagway ni Annabelle.

Sigun sa atong nakita sa mga lihok ni Ms. Annabelle Rama wala siya magtiaw sa iyang kandidatora sa pagka kongresista sa ikaduhang distrito sa dakbayan sa Sugbo busa kun gusto man sa mga Del Mar nga pabiling maghari sa nahisgotang distrito kinahanglan nga dili na sila mopahuway sa pagpangampanya tungod kay sulod sa taas nga katuigan nga sila ang naghari sa ikaduhang distrito sa Sugbo si Ms. Annabelle Rama pa ang atong nakita nga seryoso ug dili token nga kandidato batok nilang mga Del Mar.