EDITORYAL - Anti-spanking ordinance angay reviewhon

Mura baya og insulto kaayo sa bahin sa mga ginikanang tarong nga modisiplina pinaagi sa bunal nga may pagmahal    sa ilang mga anak nga badlungon ang anti-spanking ordinance.

Kay sa tuno ning maong ordinansa    nga giaprobahan sa konseho ning dakbayan mura man og nabalista na ang pamaagi sa pagtanos sa usa ka anak nga badlungon.

Dili sayop sa mga ginikanang nagmahal sa ilang mga anak nga mogamit og    bunal kun modisiplina sa ilang mga anak.

Ilabi na sa mga anak nga mosukol og ginikanan, sugarol, adis-adis, kawatan, palahubog ug uban pang matang sa bisyo nga di mohatag kanila og maayong ugma, angay silang pitolon pinaagi sa bunal nga may pagmahal.

Ang pagbunal sa anak nga badlungon, sugo sa Dios ug bisan wa siya magsitar sa matang ug klase sa bunal nga ipagamit sa ginikanan ngadto sa iyang anak, angay sabton sa tawo nga kadtong matang sa bunal nga makapahinumdom sa bata sa iyang sala ug maghatag kaniya og kahadlok sa pagbuhat pag-usab niini, maoy angay gamiton.

Aron nga mapitol   ug mohamtong siya nga buotan sa iyang ginikanan, sa iyang mga higala ug sa katilingban.

Kitang tanan nga malampuson sa karera nga nabuhi karon ug bisan kadtong nangamatay na pulos midayeg sa atong mga ginikanan kinsa migamit og latigo nga may pagmahal nga nakapahimo kanatong tawo ug maayong lungsoranon.

Sa klase sa bunal, ang ginikanan nga tarong mao nay   angay mopili niini.

Gihatagan kita og maayong pinsada sa Dios labaw sa mananap aron ilhon nato ang bunal nga makaayo sa bata ug bunal nga makamatay.

Kun tarong ka nga amahan o inahan pilion nimo ang bunal nga maayo sa imong anak ug dili kay bunal nga makamatay.

Wa ta hatagi sa Dios og utok nga sama sa Lion, Tigre, Buaya ug uban pang killer nga mananap nga kutob sa hikit-an nilang butang nga gusto nilang subaron, ila gyud kining patyon kay way adjustment ang ilang utok.

Nganong sa anti-spanking ordinance ipagan man ang mga ginikanang tarong niadtong mga ginikanang barumbado? Ang maong ordinansa alang lang tingale sa mga barumbadong ginikanan ug   way labot ang mga tarong nga ginikanan. Di ba?