Ang promo sa BOPK

Bisan layo pa ang piniliay, ang mga kandidato nagsige na sa ilang pagpangampanya. Gani ang uban kanila nag promo na aron mahalin ang ilang baligya nga kandidato. Ang Bando Osmeña Pundok kauswagan o BOPK nag BUY ONE TAKE ONE. Ang nahisgutang promo gikopya sa BOPK sa promo sa mga shopping malls. Kay sila nangopya, nahutdan na ba sila og ilang kaugalingong idiya?

Sigon sa atong nahibaw-an ang mga shopping malls mohimo’g mga pakulo aron dugokon ug mahalin ang ilang mga baligya ug ang mga dili na kaayo halinon ug daang stocks ilang ipa BUY ONE TAKE ONE aron mahalin. Buot bang ipasabot sa BOPK nga ang panagkuyog ni Kongresista Tomas Osmeña ug Bise Mayor Joy Young dili na kaayo halinon maong gipromo na lang? Sa BUY ONE TAKE ONE kun mopalit kag usa adunay pakapin nga usa busa kun mopalit kang Tomas, ipakapin si Joy. Luoyang Joy Young, pangpakapin naman lang? Ato lang unyang atangan kun mahalin ba ang promo.

Ang sayong pangampanya ni Kongresista Tomas Osmeña ug Bise Mayor Joy Young bisan sa kalayo pa sa piniliay tilimad-on sa pagkatay-og sa liderato sa BOPK. Natarantar na ang nahisgotang partido tungod sa panaghugpong ug panagkuyog sa pipila ka mga dagkong pangalan sa politika dinhi sa Sugbo ug sa grupo ni Mayor Michael Rama. Moangkon man si Tomas o dili, nasiak gayod ang iyang partidong BOPK.

* * *

Ako diay nga pahalipayan ang tanang sakop sa New Generation Against Drugs and Corruption (NEWGAD) nga nakapasar sa gipahigayong Medical Technologist Licensure Examination ilabi na ni NIKKI GIGI AYTONA LEGASPI sa Southwestern University nga nahimutang sa ikaduhang puwesto o (SECOND PLACE) sa tanang mga nakapasar. Gikan sa inyong mga officers ug Members of the Board CONGRATULATIONS.