ANO na talaga, kuya? Nu’ng tila mabagal dumesisyon at kumilos si President Noynoy Aquino, binibira siya ng mga kritiko na kesyo walang alam kundi magpaputok ng baril at mag-PlayStation. Tapos, nang kumilos na siya at pinaipit sina Gloria at Mike Arroyo sa bansa para humarap sa mga sakdal ng anomalya, at pina-impeach sa mga kapartido si Chief Justice Renato Corona dahil sa pagtatakip para sa mga Arroyo, binatikos naman si P-Noy na masyadong inaapura ang proseso.
Sa likod ng pabali-baliktad na kritisismo kay P-Noy makikita marahil ang isa sa pinaka-malaking naisakatuparan niya nu’ng taong 2011. ‘Yon ay ang pagpapairal ng hustisya. Sa paliwanag si P-Noy, walang sinisino ang batas; maging malaki o maliit na tao ay dapat managot kapag nilabag ito. At ‘yon na nga ang ginagawa niya ngayon kina Arroyo at Corona.
Sa larangan ng ekonomiya, naging matumal naman si P-Noy. Huling buwan na ng 2011 nang maipa-bidding ang dalawang unang proyektong PPP (Public-Private Partnership). Nu’ng mga naunang buwan naubos ang oras ng Cabinet economic team sa pagrerepaso ng mga dati nang proyekto at kontrata. Ang naging resulta: Kokonti ang umandar na public works projects, bumaba ang employment rate (dahil ang gobyerno na pinaka-malaking employer sa Pilipinas ay hindi kumikilos), at dumami ang mga naghihirap at nagugutom. Sana naman ay tapos na ang panahon ng pagrerepaso at, sa pangako mismo ni P-Noy, mas pagbubutihin nila ang trabaho ngayong 2012.
Isa pang malaking nagawa ni P-Noy ay sa larangan ng foreign affairs. Nailantad niya sa buong mundo ang panghihimasok ng China sa teritoryo ng Pilipinas (at Vietnam), bagay na ikinagalit ng mundo.
* * *
Makinig sa Sapol, Sabado, 8-10 ng umaga, DWIZ (882-AM). E-mail: jariusbondoc@gmail.com