Damgo sa OFW sa Hongkong

Human sa kapin usa ka tuig, naka-uli na sa Pilipinas si ‘Nova’, domestic helper sa Hongkong. Wa’y kasudlan sa kalipay si Nova samtang ako siyang nahinabi su’d sa eroplano. Alang niya, matuman na gyud ang hangyo sa iyang says anyos nga anak nga magdungan sila og uli sa iyang bana atol sa birthday niini. Nagtrabaho sa Saudi ang bana ni Nova ug su’d sa upat ka tuig, wa’ na sila magkit-anay. Nagpaabot ang iyang bana sa airport sa Manila aron magdungan sila sa pagpa-uli sa ilang probinsya. Birthday sa ilang anak ang okasyon nga ilang gi-uli sa nasud. Ug human sa upat ka tuig, magtagbo ang pamilya nga usa.

Naghinam-hinam si Nova samtang iyang gisaysay nako atol sa duha ka oras nga biyahe gikan sa Hongkong padung sa Manila. Apan lahi sa mga OFW nga puno sa daghang kabalaka ug kapait sa sitwasyon, swerte si Nova sa iyang amo. Lahi sa mga OFW nga daghan og mga kasakit nga gi-antos, kamingaw sa pamilya lang ang problema nga giatubang ni Nova. Apan bisan pa niini, wa’ siya’y planong molungtad og daghan pang katuigan sa Hongkong.

Hongkong ug Japanese national ang magtiayong amo ni Nova. Tanang bulohaton sa balay, iyang gi-abaga gikan sa pagbantay sa kapin tuig nga anak sa magtiayon, paglaba, paglimpyo ug ang pagluto og Japanese food nga maoy kanunay nga kan-on sa iyang amo. Matod ni Nova, wa’ siya’y kalainan sa housemate sa ‘bahay ni kuya’ tungod kay tanang anggulo sa ilang gipuy-an nga condominium, puno sa mga CCTV. Tanang lihok ni Nova sa balay gitutokan sa magtiayong amo ug sa mga ginikanan niini nga tua sa Japan magbase. Bilib ang amo ni Nova tungod kay wa’ silay nakit-ang sayop ang Pinay nga nagtrabaho sa ilaha.

Sa pagpa-uli ni Nova, saad sa iyang amo nga patas-an pa ang iyang sweldo gikan sa P20 mil ngadto na sa P30 mil. Ang pagpasaka sa sweldo ni Nova ang nakitang labing epektibong paagi sa mga amo aron lang gyud mobalik sa ilang poder ang 27 anyos nga Pinay. Matod ni Nova, katunga ra sa iyang sweldo ang gihatag aron lang gyud mapugos siya sa pagbalik sa Hongkong. Kung si Nova ang pabut-on, luyo sa ka maayo sa iyang amo di’ na siya ganahan nga mobalik sa Hongkong tungod kay di’ siya buot nga magdako ang iyang anak nga layo sa mga ginikanan. Apan tungod sa iyang damgo alang sa iyang pamilya, antuson ni Nova ang kamingaw ug human sa siyam ka adlaw nga bakasyon, mobalik siya sa Hongkong layo sa iyang pamilya.

Usa lang si Nova sa kapin 130 mil ka mga OFW nga nagtrabaho sa Hongkong. Sa akong paglibot sa lugar su’d sa lima ka adlaw, daghang hulagway sa mga Pinoy ang imong makita nga puno sa nagkadaiyang emosyon ug pagbati. Apan usa lang ka butang ang nagtukmod nilang tanan aron mobiya sa nasud—ang ilang tinguha nga makatabang sa ilang pamilya. Matag adlaw, libuan ka mga Pinoy ang mobiya sa nasud aron pagmatuod nga adunay katumanan ang ilang mga damgo ug tinguha alang sa ilang kabanay. 

Apan luyo sa kasakit nga gi-antos sa mga OFW labi pa ang kamingaw sa pamilya, wa’y plano ang gobyerno nga papaulion sila dinhi ug hatagan og trabaho. Ang binilyon ka pesos nga kontribusyon nila sa atong panudlanan ang dakong tabang nga ilang nahatag sa pagpadagan sa atong ekonomiya. Kung sila ang pabut-on, mas maayong dinhi nalang sila sa nasud uban ang ilang pamilya. Apan way trabahong may dakong sweldo nga gitanyag alang nila. Si Nova, siguradong di’ makalimtan ang siyam ka adlaw nga bakasyon. Apan kung kanus-a ang sunod niyang pagpa-uli, mismo siya wa’ masayod.

Email: [email protected] or [email protected]