Nganong naghikog si Angel

Naghikog patay atubangan mismo sa lubnganan sa iyang mga ginikanan si Angelo T. Reyes, retiradong heneral sa armadong kusog sa nasud. Sa buhi pa dili lang siya basta-basta nga heneral tungod sa kadaghang katungdanan nga iyang gihuptan sa kagamhanan sa Pilipinas.

Human siya miretiro sa katungdanan isip Chief of Staff sa armadong kusog sa nasud gitudlo siya ni Pangulong Gloria Macapagal-Arroyo nga kalihim sa Depensa, dayon sa departamento sa Interior and Local Government, nahimong kalihim sa kalikopan ug sa Enerhiya. Hapit upod siya mahimong kongresista isip representante sa 1-utak party-list kun wa pa siya protestahi.

Namingaw ang iyang pangalan sa mga balita human molingkod ang bag-ong administrasyon apan mitunga kini pagbalik tungod sa mga anomaliya sa armadong kusog sa nasud nga giimbestigahan sa kongreso diin nalambigit ang iyang pangalan.

Ang kanhi kalihim gipasanginlan ug gipatawag sa senado ug sa ubos balay balauranan tungod sa 50 milyones ka pesos nga pabaon nga nadala niini sa dihang meritiro siya isip Chief of Staff sa armadong kusog sa nasud.      

Mitunga sa senado human siya ipatawag apan wa nay laraw nga mobalik pa tungod sa iyang nasinati gikan sa mga senador. Gibaharan sa mga senador nga i-contempt kun magmagahi sa pagtunga apan naghikog na siya.

Tungod sa iyang pagpakamatay daghan ang nag-umol og ilang kaugalingon nga pagbasa sa huna-huna sa heneral. Dunay miingon nga seguro sad-an mao nang nagpakamatay na lang samtang ang uban miingon nga wa na makaagwanta ang heneral sa kauwaw.

Ang tawong patay di na makatubag sa mga pangutana sa uban kay mitaliwan na siya ngadto sa laing kalibotan busa di ko na lang upod siya pangutan-on sa iyang rason. Tugutan ko na lang siya nga makapahuway sa dayon kay wa ra ba tawon to siya’y pahuway samtang dinhi pa sa ibabaw sa kalibutan. Ako na lang nga panghinauton nga ang pagpakamatay sa heneral makapapursige unta sa atong kongreso nga adunay mapadulngan ang mga imbestigasyon nga ilang gihimo.