Hala kuyawa!

Diay makapahadlok nga balita alang niadtong mga lalaki nga “dukirok” kaayo og mga babaye.

Ang mga doctor sa Cebu City Health Department nakapahigayon og 32,313 ka physical examination sa mga babaye nga anaa magtrabaho sa lainlaing mga balay-kahilayan dinhi sa dakbayan.

Sa maong gidaghanon, kapin sa 7,000 niini ang na-positibo sa mga sexually transmitted diseases (STD). Ang 1,616 kanila gihimoan og “anti-body test” og napulo ang napositibo sa HIV antibody.

Apan ang labing makapahadlok mao nga tulo kanila dunay “full blown AIDS” cases. Kuyaw kaayo kun kamong mga dukirok og mga babaye mataptan og Aids, patay g’yod mo.

Maayo og mosunod mo nako nga kun makakita og gwapa nga babaye igo lang motan-aw ug sa hilom modayeg sa iyang kaanyag.

* * *

Ngano kaha nga mikunhod man ang gidaghanon sa mga kabayo ug kabaw nga gipang-ihaw sa atong ihawan diha sa North Reclamation Area?

Makaingon kaha kita nga nakabantay na ang katawhan nga nailad ra sila sa ubang magpapatigayon nga mopatoo sa karne sa kabaw nga karne sa baka aron mahalin kini og mahal?

Mahimo man god nga tungod sa paspas nga pagpangihaw sa mga kabaw, nahurot-hurot na ang maong hayop. Ang kabayo hinoon, dili kini gikan diha sa Dulho-Fatima kay ang uban ani gikan sa lagyong lugar.

Tiaw mo nga sa buwan sa Mayo adtong 2005, miabot pa og 879 ka kabaw ang naihaw dinhi sa dakbayan. Apan sa miaging Mayo karong tuiga, miabot na lang og 188.

Sa kabayo usab, 571 ang naihaw sa buwan lang sa Mayo adtong 2005, ug mikunhod kini ngadto na lang sa 101 sa buwan sa Mayo karong tuiga.

Ang baka hinoon maoy misaka ug gikusogan kay miabot og 2,079 ang naihaw sa miaging Mayo, taas kini kun itandi sa 1,559 kaniadtong Mayo sa 2008.

Ang uban god nga mamaligyaay og karne, tan-awon nila ang mopalit kun ilaronon ba og dagway. Kon tan-aw nila nga madala ra gani, imbis baka ang gipalit sagolan nila og karne sa kabaw.

Aw ang kadagkoan hinoon sa National Meat Inspection Service mitataw man nga dili makadaut sa atong lawas ang pagkaon aning kabayo og kabaw, apan nailad lang ta kay imbis barato ra unta, makabayad man ta og mahal.

Ang mayo ninyo nga buhaton, pangutan-a og unsa nga karne ang anaa gihikyad sa lamesa. Kun moingon gani ang tindera nga baka, ingna dayon nga karne sa kabaw ang imong gipangita.

Labing siguro moingon dayon ang tindera “Aw mao ba! Karne bitaw ni sa kabaw. Pila ka kilo ang imo?” He! he! He!

* * *

Akong balikon nga mas modayeg ko ni Acting Mayor Mike Rama kun mohimo siya karon og mga hukom nga magpakita nga duna siya’y political will.

Ang gipasabot nako mao ang paghimo sa kanhi Citicenter Commercial Complex nga grahe sa mga sakyanan sa dakbayan. Lig-on kaayo og atup ang maong merkado.

Ang titulo sa maong yuta ug building nabalhin na sa ngalan sa City of Cebu kay wala man mobayad og buhis ang tag-iya mao nga dili maayo nga ipagamit ra kini nga papuy-an sa mga squatters unya dunay mga mapahimuslanon nga maoy nangobra og abang sa mamuyo.

Apan mao lagi, mora’g kuwang og political will ang atong mga opisyal sa dakbayan, ilabi na nga nagsingabot ang eleksyon. Alang nako, dili sila angay’ng mahadlok.