Nagkadaghan ang mga rugby boys dinhi sa ato. Adtong Sinulog festival, usa ka balikbayan nga doktor nakakita’g duha ka batang lalaki nag-hingus-hingos og rugby. Iyang gikuha’ag hulagway. Imbes molikay, ang mga bata niposing na nuon ug mihimo’g victory sign sa ilang mga tudlo.
Sa mao gihapong adlaw, ang maong balikbayan nakasugat og mas daghan-- lima gyud -- ka mga batang nag-sniffing og rugby sa lain nasang dapit.
Milingo-lingo ang doktor nga balikbayan ug nangutana sa iyang guide: “Pinasagdan na ba lang kining mga bataa?” Ang iyang guide mitubag: “Morag mao na, Dok.”
Usa ka polis miangkon nga gipasagdan na lang kining mga rugby boys. Kay ang balaud mipabor kanila. “Imong dakpon, buhian ra gihapon kay di man nimo mapriso. Kun imong prisohon, ikaw na unya nuon ang mapriso,” matud pa sa polis.