Sa akong tan-aw, dili na kinahanglang himoon pa nga duha ang presidente sa Association of Barangay Councils dinhi sa dakbayan – alang sa north ug laing usa sa south district dinhi sa Cebu City.
Ang usa ka presidente sa ABC takus na kaayo nga makarepresentar sa kinatibuk-ang grupo sa mga opisyal sa kabarangayan.
Kon kini maoy ilang gipili atul sa eleksyon sa liga, nagpasabot nga nagrepresentar kini sa mga opisyal sa kabarangayan sa dakbayan, bisan og tua kini magpuyo sa usa ka distrito.
Hinoon, kadtong mihimo niining maong sugyot “he is entitled of his opinion that electing another ABC president will contribute to better public service.”
Kon sa inyong tan-aw nga ang presidente sa ABC nagtagad lang sa problema sa distrito diin siya nagpuyo, sipyat kamo sa inyong pagpili.
Apan tan-aw nako dili ingon niana ang kinaiya ni ABC president Eugenio “Jingjing” Faelnar, ang kapitan sa barangay Guadalupe nga sakop sa south district dinhi sa dakbayan.
Ang sugyot ni Kongresista Tony Cuenco nga magmugna og central district nga anhi sa tunga-tunga sa north ug south district, maayo man.
Apan ang epekto niini nga dugang gasto kay magdugang na man usab kita unya og mga opisyal. Magpasabot nga ang konseho unya sa dakbayan mahimo na nga kapin sa 20.
Bisan og ingon lang niini ang gidaghanon sa mga opisyal apan sinsero lang sila nga motuman sa ilang katungdaan, sigurado gihapon sila nga makaserbisyo sa katawhan.
Unsaon, kini gong uban nga politiko posible man nga duna sila’y political agenda sa paghimo nila og kausaban. Mao kini ang angay nato nga bantayan.
* * *
Ang pletehan sa atong mga PUJ angay na g’yod nga ibalik sa P6.00 sa minimum fare.
Barato na g’yod ang presyo sa krudo nga maoy sagad gigamit sa atong mga PUJ pagpadagan sa ilang sakyanan. Kaniadtong ang krudo miabot og P61.76 ang litro, ang pletehan gipausbawan ngadto sa P8.00.
Apan karon nga ang presyo miabot na lang og P36.76 unya may giingon pa gani nga laing pagminus sayo kagahapon sa buntag, ang pletehan giibanan lang og 50 sentimos. Makiangayon ba kini?
Unsa kining report nga akong nadungog nga mao nga ang Land Transportation Franchising and Regulatory Board mag-ukon-ukon sa pagpakunhod sa pletehan sa PUJ kay daghan diay sa mga opisyal sa LTFRB nanag-iya usab og mga PUJ.
Akong awhagon niini si Atty. Manuel Iway, ang labing aktibo sa lakang pagpakunhod sa pletehan nga gitumong sa paglaban sa katungod sa mga sumasakay nga iya ning susihon.
Kon tinuod man gani kining report nga akong nadungog, dili kini maayo. Conflict of interest! Salamat daan kon matagad kini ni konsehal Jack Jakosalem, chairman sa committee on transportation sa konseho sa dakbayan sa Sugbo.
* * *
Nalipay ko sa pasalig sa ubang konsehal nga tabangan kaming mga reporters nga maka-access sa Wi-Fi diha sa City Hall session hall.
Ako g’yod ang nangusog niini kay samtang ang uban nakong mga kauban gusto unta, gidaug sila sa kaikog sa mga konsehal.
Sa ilang pagpangampanya, moingon sila nga “Hari ang Lungsod” unya karon sila diay ang maghari-hari nga ang publiko o ang media hikawan paggamit sa maong kahimanan nga pinalit gikan sa kwarta ug buhis sa katawhan?