Sakpan ang binuang

Angay’ng kampanyahan sa atong mga tigpatuman sa balaud kining mga passenger jeepneys kang kansang mga drayber mopasakay og subra nga pasahero aron modaku ang ilang kita luyo sa kalisud sa ilang mga sumasakay.

Sagad kuno niining maong mga PUJ’s anaa magbiyahean sa Inayawan paingon dinhi sa downtown area, ilabi na panahon sa gabii ug kaadlawon.

Ang gwardya namo diri sa The Freeman maoy nagpahibalo nako niini og mikuha gani sa plate numbers sa PUJ. Kinsa ba’y drayber aning PUJ nga dunay plaka nga GWU-968.

Tiaw mo, tag-dose-dose na kuno ang pasakyon sa kada kilid imbis tag napulo ra man unta. Ang mga pasahero god kuno mapugos na lang sa paglingkod nga pinabitay ang sampot, paita.

Kamong mga pasahero, ayaw mo pagsugot nga ingon niini ang buhaton sa mga drayber ug kondoktor sa mga PUJ. Ilista ang plate numbers ug isumbong sa mga tinugyanan sa balaud.

Timan-i usab ninyong mga kondoktor nga sagad ninyo walay mga permit, nagpasabot nga mahimo kamo nga madakop ug mamultahan. Ayaw ninyo sakripisyoha ang mga sumasakay.

* * *

Kaniadtong Lunes o Martes ba kadto, nasundan nako ang usa ka truck – plate numbers GWA-527 — nga nagsubay sa Imus Avenue ug nagkarga kini og ten-footer container van.

Kadtong maong truck mahimo nga kakargahan og container van, apan alang ra sa 20 footer kay aron ma-lock ang van sa iyang kaha sa truck ug dili kuyaw nga mahulog.

Apan kay ang gikarga 10-foot van man, sa ato pa igo lang gitong-tong ang container van ug peligro kaayo kini nga makadisgrasya. Kun matagak ang maong van ngadto sa usa ka kotse, maunsa kaha ang nagsakay?

Mao kini ang angay’ng bantayan sa atong mga traffic enforcers nga igmata g’yod ang inyong mga mata nga motan-aw niini. Dunay resolusyon niini ang konseho sa dakbayan.

Apan kining maong gi-report nato karon, wala lang tingali kini tagda sa Citom nga gidumala ni Arnel Tancinco kay wala man kini makapasakit niya sa mga komentaryo.

Ang The Freeman kay kanunay man si Arnel nga latigohon sa mga pagsaway mao nga bisan gamay kaayo, iyang gidaginot aron kami nga moparking sa among parking area magkalisud-lisud.

Padayon nako nga gihagit kini si Arnel Tancinco nga iyang pamatud-an nga dili siya bakakon. Apan pagka karon, ang tan-aw nako kaniya usa ka tawo nga bakakon kay wala man niya gituman ang iyang mga gipanulti.

Panahon nga kini si Arnel pakighinabian sa mga announcer sa radyo, manglimbawot ang akong balhibo kay nasayod ko nga ang iyang gipanulti kutob ra sa dila.

* * *

Giawhag karon ni Konsehal Edgardo Labella ang mga dealers og LPG nga likayan nila ang pag-deliver sa maong mga produkto nga ikarga lang og motorsiklo unya higtan lang og pisi dayon ikarga sa luyo.

Tinuod, makahatag kini og kakuyaw. Pananglit matagak ang maong mga LPG tanks sa karsada, mahimong madam-agan kini sa mga magsunod nga sakyanan.

Dili usab tingali imposible nga dunay mga higayon nga mobuto ang maong mga tangke human kini mahulog gikan sa gikargahan nga motor.

Sigurado ko nga kining maong resolusyon ni Labella suportahan sa mga kauban niyang konsehal.

Akong balikon, alang niadtong dunay mga komentaryo sa mga isyu nga atong hisgotan, padad-i ko sa inyong mga huna-huna. Mahimong sa suwat o kaha sa akong e-mail address [email protected].