Angayang masayran sa publiko ang kahimtang sa nasud, busa karong hapon dungan sa pagbukas pagbalik sa sesyon sa kongreso diin ang Senado ug ang ubos Balay Balauranan maghugpong, himuon ni Presidente Gloria Macapagal Arroyo ang iyang report ngadto sa katawhan pinaagi sa paghatag sa iyang ika-walo nga “State of the Nation Address” kon SONA.
Duha lang ang mahitabo sa SONA sa presidente, una mao ang pagtug-an sa katawhan sa nahimo sa iyang administrasyon ug ang ikaduha mao ang pagpahibawo nila sa plano pa nga himoon sa iyang pamunoan.
Karon nga nagsaguyod ang popularity rating sa presidente mas makatabang niya kun iyang itug-an ang tinud-anay nga kahimtang sa Pilipinas ug admitihon ang iyang mga kakuwangan ug hangyoon ang oposisyon nga tabangan siya unsaon nga mapalambo ang atong kahimtang taliwa ning grabe nga krisis nga atong nahiaguman.
Wa kinahanglana ang gipaabot nga ulog-ulog ni Presidente Arroyo sa katawhan labi pa ang pamolitika karong panahona. Sayod ko bisan unsaon pa og pahumot ni Arroyo pinaagi sa pagpresentar og statistics aron kunohay pagpakita nga niusbaw ang Gross National Product ug nilig-on ang piso atubangan sa stocks exchange, di ni hisabtan sa kadaghanan.
Kini tungod kay wa may epekto nga nidagayday niini ngadto sa ilang mga talad kan-anan. Hangtud karon sigun sa survey nag-anam man kadaghan ang mga tawo nga gigutom ug nagkadaghan sab ang mga tawo nga way trabaho.
Alang nako tulo lang ka butang ang sukaranan pag-ila sa malamboon nga nasud ubos sa pagdumala sa usa ka maayong lider. Una; duna ba’y igo nga kita? Ikaduha, may pagkaon ba ang katawhan? Ug ang ikatulo, may trabaho ba alang sa tanan?
Sa maong mga sukaranan dili na tingali angayang tagsa-tagsaon ko pa pagpasabot tungod kay hayag pa’s udtong tutok ang kamatuoran. Suroyon lang nimo ang kamerkadohan, ang taas nga linya sa mga kabus nga nag-antos sa naglagiting nga kainit sa adlaw paglinya aron lang makapalit og usa ka kilo nga bugas maoy nagtug-an sa tinud-anay nga kahimtang sa atong nasud.
Ang way pu-as nga umento sa presyo sa produktong petrolyo ug ang epekto niini ngadto sa batakang palaliton maoy kahimtang nga way bisan kinsa nga maayong laki nga “speech writer” nga makakombinsir sa katawhan nga nilambo ang atong pagkabutang ubos sa administrasyong Arroyo.
Pero bisan ingon niini ang atong kahimtang di sab maayo ang awhag sa mga militanteng grupo nga i-boycott ang SONA sa presidente. Unsaon man sa katawhan pagkasayod kun nanglingla ba ang presidente o wala kun di sila maminaw? Ang panawagan sa mga militante nga i-boycott ang SONA klaro nga pagpanglubog sa huna-huna sa katawhan aron mas sayon nilang ilaron sa kunohay prinsipyo nga ilang gibarugan apan ang tinuod dakong negosyo, pangwarta ug pagpahimulos sa kakuwang kahibawo sa katawhan.
Mas maayo nga atong paminawon ang SONA sa presidente aron atong masayran kun basi sa atong kaugalingon nga obserbasyon iya ba nga natuman ang iyang mga saad sa milabay niya nga paghatag og report.
Pananglitan sa kadaghan sa mga gisaad ni Arroyo sa miagi niyang SONA ang akong nabantayan nga natuman niya mao lang ang nautical highway ug ang pagpatuman sa EVAT nga maoy nagsilbing bug-at nga krus natong mga kabus.
* * *
E-mail: fplanguido@yahoo.com