Pebrero 10, 2008: Unang Domingo sa Kwaresma
Mga Pagbasa: Gn. 2:7-9;31-7/Sal.51/Rom.5:12-19/Mt. 4:1-11
Ang tental
Gihagit dili lang ang katakos sa atong Ginoo kundili hasta na usab ang iyang pagkamatinud-anon ngadto sa iyang Amahan. Daghan kaayo og haylo ang prinsipe sa tanang bakak nga mao ang yawa. Apan bisan pa niini, ang atong Ginoong JESUS ang wala gyud motubay sa maong ilad. Nagpabilin siyang malig-on diha sa pag-atubang sa mga tentasyon sa yawa nga buot mopakgang sa laraw sa Dios pinaagi kang Jesus.
Daghan ang nangutana: “Sala ba gud ang tentasyon?” Ang tubag: “Dili!” hinuon okasyon kini sa pagpakasala kun ang tawo motahan ni motugot nga linglahon sa haylo sa dinaliang katagbawan. Daghan ang natental sa pagtuo nga pinaagi sa pagsanong usa ka awhag sila mamahimong gamhanan, bahandianon, ug inila. Ang wala lang nila masayri nga ang lingla ni Satanas ang magdala gayud og kamatayon inay ang kinabuhi. Hinuon adunay epektibong hinagiban aron dili matental ang tawo ug kini ang gamhanang hinagiban sa PAG-AMPO.