Usa ka magbabasa niining lindog nagkanayon: "Aduna unta koy isugyot ug ihangyo diha nimo. Kon mahimo unta inyong mapublikar sa Banat News ang usa ka pahimangno alang sa mga sumasakay sa mga publikong sakyanan aron mabasa sa katawhan nga: Dili unta sila mogamit sa cellphone samtang magsakay sa publikong sakyanan aron dili sila matulis. Salamat." -- 0927-2002301 (Sept. 27, 2006 -- 11:15:12)
Una sa tanan, magpasalamat ko sa sugyot ug ideya sa atong texter. Apan sa akong tan-aw, wala na kinahanglana nga maggahin pa ang Banat News og espasyo alang sa maong pahimangno. Gawas nga kulang kami kanunay sa espasyo, kining maong lindog uban sa lain pang mga lindog nga kanunay nag-awhag sa pagpahimatngon sa katawhan, magsilbi nang pahimangno sa mga magbabasa kon ila lang untang hatagan og bug-at nga pagtagad ang atong gipangsulat dinhi nga mga pahimangno. Alang nako, ang mga pamantalaan sa Sugbo wala magkulang sa pagpahimangno sa publiko. Daghan lang gyod ang atong kaigsuonan nga kompiyansador kaayo.
Maayo ang ideya nga gipasupot sa atong texter. Apan kon magbutang man og pahimangno nga ingon sa iyang gidetalye sa iyang text, mas praktikal tingali kon anha kini iistampar sa mga publikong sakyanan. Pero, mao lagi...kon dili lang magtagad ang katawhan sa pahimangno, walay kapuslanan ang tanan bisan pila pa ka pahimangno ang atong himuon. Aduna gihapoy mabiktima sa tulis kon tamhang ang katawhan.
Labaw sa tanan, hangtod nga dili masumpo ang modus operandi sa mga tulisan, dili kita makapaabot og hingpit nga kasulbaran sa krimen. Kinahanglan gyod nga hugtan sa mga tinugyanan sa balaod ang paggukod sa mga tulisan aron mataral sila sa hukmanan ug kasilotan tugbang sa sala nga ilang nahimo.