Kon wala ako masayop, duha na ka higayon nga akong gihisgotan dinhi ning ubos kong lindog ang modus operandi sa mga badlongon sa katilingban nianang dapita. Gihisgotan ko kini tungod usab sa text nga akong nadawat gikan sa mga biktima sa tinunto sa mga badlongon nianang dapita.
Ang estilo mao nga maniid lang sila sa mga tawo nga maglakaw sa daplin sa karsada. Sundan nila kadtong nagkalibhay og knapsack sa luyo. Sa labing inantigo ug pinong paagi, ila kining ablihan ug kuhaon ang tanang valuables sa sulod niini sama sa cellphone, kuwarta ug uban pa.
Apan sukad nako gibulgar dinhi sa tinunto sa mga badlongon nianang dapita, wala na ko papahulaya sa mga text. Kada adlaw makadawat kog reklamo mahitungod sa mga mangunguot nianang dapita. Hangtod karon nagpabilin nga wala masumpo ang maong mga badlongon. Hapit na ko pul-i sa mga text reklamo. Apan hangtod nga dili mahilom ang mga reklamo, dili sab nako lung-an ang pagpahimangno sa katawhan mahitungod sa mga mangunguot nianang daptia.
Apan demalas kay sa paglabang niya diha sa may eskina sa Colon ug Osmeña Boulevard, nadakpan siya sa CITOM. Unsaon, dili pa man siya suheto sa balaod sa trapiko sa siyudad sa Sugbo. Gihatagan siyag option sa arresting officer sa CITOM: 1 (upat ka oras nga seminar, ug 2) bayad og P50.00 aron dili malangan. Ang seminar molungtad (kuno) sa upat ka oras. Pero kay nainteres siya sa pagkasayod sa balaod sa trapiko, wala siya mobayad og P50.00. Miseminar siya.
Pero iyang nadiskubrehan nga morag panglingla lang ang giingong upat ka oras nga seminar sa madakpan. Matud pa ni Bernales, wala pay 30 minutos natapos na ang seminar. Busa nakaingon siyang lansis lang ang gipatuo nga upat ka oras nga seminar aron daghan ang mobayad sa tag P50.00.
Unsa man kaha kini ka tinuod? Dili kita motuo niini pero mao kini ang gireklamo ni Bernales. Maayo tingaling pasabton kita sa CITOM mahitungod niini. Ug alang niadtong nakasinati sa sama sa nahitabo ni Bernales, text kamo kanako bahin sa inyong kasinatian.
(Sumbong ug reklamo? Text sa 0910-8105522)