Ang maong editoryal mitandog sa sugyot sa Presidente nga mas maayo pang magbaklay o kaha magbisikleta na lang ta gumikan sa nagpadayong pagsaka sa presyo sa gasolina.
Atong gihisgutan ang duha ka nasud sa Asia diin liboan ka mga lomulopyo niini ang migamit sa bisikleta isip ilang transportasyon.
Sa iyang pagpakighinabi sa Banat News, si Dr. Gallego, kinsa nakapuyo sa London og napu ka tuig, nagkanayon:
"Didto sa London, daghan ang magbisikleta padung sa ilang trabahoan o eskuwelahan. Babayeg lalaki mobisikleta dili lang aron maglingaw-lingaw kundili sa pagtuman sa ilang inadlaw'ng mga bulohaton."
Si Dr. Gallego mipuno: "Bisan mga opisyal sa gobiyerno, lakip na ang pipila ka mga MP (members of parliament), makit-ang nagbisikleta padung sa ilang opisina. De Amerikana pa sila."
Suma pang Dr. Gallego, dinhi sa ato gikauwaw sa atong mga dagkong opisyal ang pagsakay og bisikleta padung sa opisina. "Mosakay gyud sila sa mahalong kotse nga kusog kaayo moyarok og gasolina," ang atong reader nagkanayon.
Oh, well, sagdi lang na sila, Doktor, kay di man ilang kuwarta ang ipalit sa gasoline. Ato man.