May tinuod ba nga kapilian?

Wa koy planong mobotar sa eleksiyon sa barangay karong adlawa. Wa kong kahibawo kinsa ang nanagan sa barangay diin ko narehistro. Kay hangtod karon rehistrado pa ko sa Barangay Pagsabungan, Mandaue City. Nga maoy akong pinuy-anan dihang nagtrabaho pa ko sa dyAB sa ABS-CBN Cebu.

Tungod sa kahasol, gawas nga wa ko kakita sa panginahanglan, wa nako ibalhin ang akong rehistrasyon sa Barangay Casili, Consolacion, nga mao karoy akong gipuy-an. Kapasanginlan ko nga iresponsable nga botante, o nag-usik-usik sa akong katungod sa pagbotar, wa ko magtagad pag-ila sa mga nagpapili.

***

Pero nasum-ok ko og barangay nga pipila sa mga botante niboluntaryo sa mosunod nga kasayuran:

•             Duha ang nagpapili pagka barangay kapitan, ang incumbent gipaluyohan sa kongresista sa ilang distrito ug ang nihagit anak sa ilang mayor;

•             Ang incumbent wa katiwas og kurso pero suod sa mga molupyo, ang kaatbang gradwado pero karon pa magpakita ug gikabalak-an nga di managad nila kon maoy modaog;

•             Kay kontra man sa mayor ang incumbent, napasagdan ang ilang basura ug mga kanal, nga posibleng ma-atiman na kon ang anak sa mayor ang ilang pilion;

***

•             Mga lider sa incumbent nipasalig nga tag-?2,000 ang ihatag kada botante;

•             Mga lider sa anak sa mayor nipasalig nga tag-?1,000 ang ihatag sa kada botante;

•             Imbes maglibog, nakahukom ang mga botante nga akong nahinabi nga dawaton nila ang tanang ihatag sa duha ka grupo, magpaabot duna pa bay idugang sa adlaw sa eleksiyon, ug unya na mohukom kinsa ang pilion kon tua na sa sud sa ilang presinto.

***

Di ba mahasol ang ilang konsiyensiya nga modawat og kuwarta sa eleksiyon? Dili, kay pulos man nanghatag ang duha nga nagkaatbang. Mag-agad ba ang ilang boto sa mas dako og hatag? Depende, kon mao sab ang ilang makita nga mas makatabang sa ilang barangay.

Nabalaka ko nga di monopoliya ning maong barangay ang talagsaon nga pagbalanse sa mga botante sa ilang konsiyensiya, sa panginahanglan sa kuwarta ug sa kaayuhan sa ilang lugar. Nakaila sila sa mga nanagan, nahibawo sila unsay mga panginahanglan sa barangay, nakasabot nga di angayng ibase sa padaghanay og kuwarta ang ilang desisyon, pero duna ba silay tinuod nga kapilian?