Pag-ihap sa mga adlaw
“Inihap na lang ang mga adlaw sa smugglers ug hoarders!” nideklarar si Presidente Ferdinand Marcos Jr. atol sa ikaduha niyang State of the Nation Address (SONA) niadtong Hulyo 24. Maong nag-ihap sa nisunod nga mga adlaw ang mga konsumidor nga nag-antos sa kanihit ug kamahal sa inadlawng palaliton.
Dihang sa kataposan iyang giangkon ang krisis sa bugas humay, nga sa nangaging mga buwan iyang gipasalig nga di g’yud mahitabo, gibasol na sab ni Marcos ang smugglers ug hoarders nga maoy hinungdan sa pagpahamtang niya og price control sa bugas humay.
* * *
42 ka adlaw na ang naihap gikan sa SONA, kanus-a una niyang gihudlat ang smugglers ug hoarders, hangtod sa pagbiya niya para sa ASEAN Summit sa Indonesia niadtong Septiyembre 4, kanus-a gibasol na sab niya ang smugglers ug hoarders.
Bisan unsaon pag-utingkay sa tanang lakang nga gihimo sa Malacañang ug ubang ahensiya gobyerno sa kada adlaw sa niaging 42 ka adlaw, way bisan usa ka smuggler ni hoarder nga nadakpan, nakasohan ug nasilotan. Pila pa ka adlaw ang kinahanglan nga iphon sa katawhan una matuman ang lain niyang saad?
* * *
Niadtong Agosto 24, ang Bureau of Customs (BOC) ug Philippine National Police (PNP) nironda ug nikandado sa mga bodega sa Bulacan nga dunay ?505 milyones nga balor sa imported nga bugas humay gikan sa Vietnam, Cambodia, ug Thailand nga gidudahang smuggled.
Kay nahinayak na man ta og ihap, 12 ka adlaw na human sa ronda. Wa pay kaso nga napasaka batok sa mga tag-iya sa gironda nga mga bodega sa Intercity Industrial Complex in San Juan, Balagtas, Bulacan.
* * *
Wa say kasong napasaka human sa mga ronda sa BOC sa niaging tuig nga nisakmit sa gidudahang smuggled sugar sa mga bodega sa Pampanga niadtong Agosto 18 ug sa Bulacan niadtong Agosto 19. Kay dunay mga dokumento nga legal ang importasyon.
Kon iphon na sab, 382 ka adlaw na human unang namasangil ang administrasyon sa smugglers ug hoarders. Kay wa pa may nadakpan ug nakiha, mosamot ang pagduda nga ang smugglers ug hoarders dunay kakonsabo nga labing dagkong opisyal sa gobyerno. Gihimo lang ungo-ungo aron makapanghunaw sa responsibilidad kada dunay moulbo nga krisis sa agrikultura.
- Latest
