Paglawog sa OFWs sa tirong
Ang slogan nga “We Give the World Our Best,” nga nipasigarbo sa Overseas Filipino Workers (OFWs), nangalisbo nga baratilyo sa atong mga mamumuo. Imbes mauwaw sa kapakyas sa paghatag og mas maayong trabaho sa atong nasud, atong gipasaligan ang kalibotan nga nibiya sa Pilipinas ang labing maayo sa atong mga trabahante.
Sayop ang pasumbingay sa slogan. Di makiangayong kapilian ang pagtrabaho sa gawas. Mayoriya sa OFWs napugos pagbiya sa ilang pamilya. Kay kutob ra sa pagarpar ang gobyerno. Nagpabilin nga barato ang suweldo ug benepisyo kon magpabilin sila sa nasud.
* * *
Way lalis. Angayng ipasigarbo si Mary Parsons kansang hulagway gisumpay sa slogan nga gibandera sa buses sa London. Ang Pilipina nga nurse takos nga nituman sa lisod nga tahas: Paghatag sa unang bakuna sa COVID-19 samtang nisulbong ang pandemya.
Pero si Parsons nagrepresentar sa atong healthcare workers nga napugos paglayas sa nasud. Di tungod kay naglikay pagtambal sa atong mga masakiton kon dili tungod sa pahimus ug panaugdaog nga bugti sa ilang pagrisgo sa kahimsog ug kinabuhi. Si Parsons simbolo sab sa pagpabaya sa atong gobyerno sa public health.
* * *
Angayng hunungon ang bakak nga ulug-ulog. Human ilha nga modernong mga bayani, gipasagdan sa Malacañang ang OFWs. Nga gipanglugos ug giluba sa abusadong employers. Nagkarakara lang ang gobyerno dihang nakit-an nang mga patayng lawas sa disyerto ug sud sa refrigerator.
Abundang luha sa buaya sa mga opisyal. Nanegurong maletratohan sa media. Uban sa nagbangotan nga mga pamilya. Pero pabiling tagulilong sa mga higayon sa pagpakitabang. Sa buhi pa untang gihasi nga OFWs.
* * *
Ang pagtanyag sa OFWs nga maoy labing maayo sa Pilipinas mao ang pagpili sa sayop imbes sa sakto:
• Paghangop sa dollar remittances imbes pagpalambo sa mga industriya ug pagmugna og dugang trabaho;
• Pagtugot sa brain drain, nga ubang kanasuran ang makapahimus sa kinakusgang talento sa mga Pilipinhon, imbes pagdasig sa katawhan pagtabang pagtikad sa nasudnong kalamboan;
• Paglingiw sa pagkabuak-buak sa mga pamilya imbes sa pagdasig nila paghiusa ug pag-inunongay pag-atubang sa kinadak-ang mga pagsuway sa kinabuhi; ug
• Paglawog sa atong katawhan ngadto sa kaluoy ug pagpanamastamas sa mga langyaw imbes sa pagdasig nila pagpabilin ug paghigugma sa nasud ug pagpasidungog sa atong kasaysayan.
- Latest
