Nagkatuiris gihapong numero
Mag-usa ka tuig na karong semanaha human ideklarar sa World Health Organization (WHO) ang pandemya sa COVID-19, wa pa gihapon magkadimao ang mga numero sa Department of Health (DOH). Padayong nagkasungi ang ilang inadlaw nga ihap sa bag-ong mga kaso kon ikumparar sa mga taho sa mga syudad ug mga lungsod.
Bisan unsa na lay pagpasabot nga gihimo sa DOH, kadaghan na nila usba ang kamada sa ilang mga numero, apan pabilin nga naglibog ang publiko nganong wa gihapon magtakdo ang mga numero sa DOH ug sa ilang mga mayor.
* * *
Labing bag-o nga timaan nga wa pa masulbad ang problema mao ang managlahi nga gidaghanon sa bag-ong mga kaso nga gipahibawo sa DOH Central Visayas ug sa pipila ka syudad ug lungsod sa Sugbo niadtong Biyernes, Marso 5:
• Nitaho ang Talisay City og 21 ka kaso pero 15 ray gitaho sa DOH;
• Nipahibawo ang Liloan og walo ka kaso pero 11 ang gitino sa DOH; ug
• Nitaho ang Samboan og 11 ka kaso ug ang Sibonga og lima ka kaso pero way bisan usa ka kaso nga gilista ang DOH.
* * *
Mahimong molusot ang DOH-7 nga managlahi ang mga adlaw nga gibasehan sa ilang mga numero. Kon mao, nganong pareho man ang ilang mga numero sa mga syudad nga kinadaghanan og kaso sa rehiyon sama sa Cebu City (172), Mandaue City (73), ug Lapu-Lapu City (54)?
Pasayloa nga wa nako masusi nitakdo bang mga numero sa DOH ug sa ubang mga syudad ug lungsod kay kasagaran sa mga mayor nihunong na sa pagtaho sa bag-o nilang mga kaso.
* * *
Laing buslot nga nabantang sa taho sa DOH niadtong Marso 5: Gilista nila ang usa ka kaso sa Bulacao --sa way pagklaro kon Bulacao, Cebu City o Bulacao, Talisay City ba.
Ug sa pagtaho sa nasudnong DOH sa kinadaghanang kaso sa usa lang ka adlaw karong tuiga (3,439) niadtong Sabado giangkon na sab nila nga may duha ka recoveries nga nadoble nila og lista ug may 15 ka recoveries nga ilang napamatud-an nga nangamatay diay. Wa sila magtagad sa pagpasabot ngano nga kasagaran sa ilang mga sayop mao man g’yud ang pagpaburot sa recoveries.
- Latest
