Mahimong ang-ang ang panagang
Atubangan sa pasidaan sa World Health Organization (WHO) nga mahimong moabot og duha ka milyon ang mangamatay sa Covid-19 sa mosunod nga mga buwan, nisamot kahigpit ang kalibotanong lumba sa pagmugna og luwas ug epektibo nga bakuna o mga bakuna batok sa kagaw.
Mahibaw-an unsa kaluwas ug ka-epektibo ang nag-una nga kandidatong mga bakuna nga nagpahigayon na og Phase 3 clinical trials sa nagkalainlaing kanasuran. Ang pasiunang mga sangpotanan sa mga pagtuon nga pulos naglambigit og kaliboan ka boluntaryo gitakda nga sunudsunod nang ipahibawo sa mga tigpasiugda sugod karong buwana.
* * *
Tungod sa kalapad sa kadaot sa pandemya ug sa kadinalian sa panginahanglan sa pagpabarug pagbalik sa nalup-og nga kalibotanong ekonomiya, nagkauyon ang mga eksperto sa nagkalainlaing kanasuran sa labing yano nga mga lagda sa pagsukod sa ka-epektibo sa kandidato nga mga bakuna:
Una, kinahanglan nga patas-an ang panginahanglan sa ka-epektibo aron nga tinuod nga makatabang sa pagpanalipod sa katawhan gikan sa kagaw; ug
Ikaduha, kinahanglan nga pamub-an sab ang panginahanglan sa ka-epektibo aron nga ang masaaron nga bakuna o mga bakuna makapasar hangtod nga dunay mas maayo nga moabot.
* * *
Karon pa lang, gipahibawo nang daan ang mga tighimo sa mga bakuna unsa ang kalidad nga kinahanglan nilang apson:
Ang Food and Drug Administration (FDA) sa Estados Unidos nitataw nga ilang aprobahan ang bakuna o mga bakuna nga mapamatud-an nga labing menos 50% nga epektibo, o makaiban og katunga sa kalibotanong hulga sa Covid-19; ug
Ang WHO niingon nga mahimong aprobahan ang bakuna nga 50% nga epektibo apan mas maayo kon moabot og 70% ang ka-epektibo.
* * *
Maong gidasig sa FDA ug WHO ang mga tigpasiugda sa pagpalapad sa ilang clinical trials nga kinahanglan nga maglakip sa mga molupyo sa nagkalainlaing bahin sa kalibotan ug nagrepresentar sa managlahi nga edad, kaliwat ug kahimtang sa panglawas.
May kandidatong mga bakuna nga igo lang manalipod sa mga pasyente gikan sa grabeng mga epekto ug kamatayon. Maong angayng pasabton ang katawhan nga bisan sa may bakuna o mga bakuna na masakit gihapon sila ug mahimong manakod sa uban. Sa ingon makapangandam tang tanan sa kamatuoran nga ang bakuna o mga bakuna di makapuli sa face masks ug physical distancing.
- Latest
