Tinuod bang kolorum ang test kits?
Gipagamay ni Cebu City Mayor Edgar Labella ang nagkasungi nga kasayuran sa kampanya batok sa COVID-19 nga gipahibawo nilang Cebu City Administrator Floro Casas Jr. ug Cebu City Health Officer Daisy Villa nga usa lang ka kaso sa “miscommunication” ug nga nagkasulti ug nagkasinabtanay na ang duha ka opisyal.
Wa magtagad si Labella sa pagsulti kinsa nilang Casas ug Villa ang nagsulti sa tinuod ug kinsa nila ang namakak. Kay ang managlahi nga mga pangangkon nilang Casas ug Labella pulos nagmatuod sa dakong buslot sa kampanya nga gipangulohan ni Labella.
* * *
Usa sa labing seryuso nga pasangil ni Villa mao ang pagpamugos nilang Casas ug kaubanan sa paggamit og rapid test kits nga wa pa aprobahi sa Food and Drug Administration (FDA). Inay isalikway nga “miscommunication” lang, angayng mohatag si Labella og dugang kasayuran sa mga Sugbuanon:
• Unsa may brand sa kolorum nga rapid test kits, diin mang nasura himoa ug may aplikasyon na bang nag-ung-ong sa FDA?; ug
• Kinsa may nagpasiugda sa transaksiyon pagpangompra sa wa marehistro nga rapid test kits ug pila may gasto sa Cebu City Hall?
* * *
Kalibogan sab unsay tinuod nga nahitabo sa mga molupyo sa Sitio Zapatera sa Barangay Luz sa Dakbayan sa Sugbo nga na-positibo sa COVID-19:
• Tinuod bang gibakakan ni Casas ang mga sakop sa Cebu City Council nga nakagawas na ang tanang 100 ka pasyente gikan sa isolation center sa Barangay Luz?; ug
• Tinuod bang naglangay-langay si Villa pagpa-ubos sa COVID-19 test sa 100 ka pasyente maong nilapas na og usa ka semana ang ilang pagkatanggong sa isolation center?
* * *
Inay hiluton lang ang panagsungi sa duha niya ka sinaligan, angayng ipasabot ni Labella sa mga Sugbuanon nganong nagkaguliyang ang kampanya:
- Gideklarar ni Casas si Villa nga di kamao sa iyang trabaho, nangunay pagpahigayon sa COVID-19 testing inay nga moduma sa kinatibuk-an niyang buhatan; samtang
- Nipasangil si Villa nga siya ang gipaduma sa rapid mass testing sa mga molupyo sa kabarangayan ubos sa programa nga wa siya konsultaha, igo lang gipamugos sa daghang opisyal nga pulos di doktor, ug ginamit ang rapid test kits nga wa niya saligi maong gitawag niya ang kampanya nga blood extraction ug di testing.
- Latest
