Labing laktod para Sinulog
Sud sa daghan na uyamot nga katuigan, duna koy kinaham nga agianan nga bisan sa nagbaha nga katawhan ug gitak-opan nang kadalanan mohatod gihapon nako pila na lang ka lakang gikan sa Cebu City Sports Center (CCSC) alang sa tinuig nga coverage sa ABS-CBN Central Visayas ug dyAB Abante Pa, Bisaya! Sa Sinulog Grand Parade.
Nahibung ang akong kaubanan kay wa man ko mokuyog nila nga nangadlawon pagsud aron nga di maabtan sa mas higpit nga seguridad. Ako silang gitug-anan sa agianan nga kay wa man nako ipanabi giisip nila nga tinagoan.
***
Nihangyo ko sa among sibyaanan nga di moapil sa among coverage karong tuiga. Apan ila kong gitanyagan nga adto na lang manukad sa among studio sa Jagobiao sa Mandaue nga mada ra og baktas gikan sa among bay sa Consolacion.
Mao nga akong pakisaw-an nimo, kay tingali usa ka sa gikutasan sa taas nga baktas gikan sa Carreta o Fuente Osmeña o Plaza Independencia paingon sa CCSC, nga ang akong napamatud-an nga labing laktod nga agianan mao ang dan Sanciangko, nga usa ra ka eskina gikan sa sentro sa mabulukon nga parada.
***
Kon nagdali ka, mahimong mag-taxi. Kon daghan og kuyog, mahimo mong manakay og PUJ. Mahimong manaog sa eskina Osmeña Boulevard o eskina Leon Kilat.
Duol sa dan Leon Kilat ang luyo nga gate sa CCSC nga maoy gawasanan sa dancing contingents human nila og pasundayag sa grand stage. Usahay pasudlon ka sa polis kon magpakita og ID. Apan kon higpit ang seguridad, mahimo rang molinya sa entrance gate sa Osmeña Boulevard.
***
Dihay mga higayon nga human sa coverage nakatsamba ko og taxi o PUJ sa Sanciangko para pauli. Apan karong bag-o, labihang daghana na sa mga tawo ug labihang nihita na sa mga sakyanan nga sa Mabolo na kong nakasakay, may katuigan ganing naabot ko sa Subangdaku sa Mandaue.
Apan kon nabalaka ka sa gitakdang pagpawong na sab sa signal sa mobile phones, o sa mas hugot nga mga lagda sa seguridad tungod sa gitakdang pagtambong ni Presidente Rodrigo Duterte, o gipul-an na sa balikbalik nga mga sayaw, tug-anan tika og laing sekreto: Mahimong saulugon ang Piyesta Senyor gikan sa layo.
- Latest
