Kahigwaos sa MCWD

Kasagaran sa mga sakop sa Board of Directors sa Metro Cebu Water District (MCWD) gitudlo ni kanhi Cebu City Mayor Tommy Osmeña uban ang tag-pito ka tuig nga termino. Sa ato pa, mapupos na lang ang mga termino sa lokal nga mga opisyal nga nanghimaraot nila magpabilin pa sila sa katungdanan.

Lahi sa department heads ug regular nga mga kawani sa local government units nga dali rang ilabay sa labing lagyo nga mga dapit ug labing laay nga mga gimbuhaton, lisod sila nga matangtang ug mapulihan. Maong gihasi na lang.

* * *

Kon nakugang ka sa kalit nga panagtakdo sa panghunahuna sa lokal nga mga opisyal sa Cebu City ug Mandaue City ug sa Kapitolyo nga ang mga tagduma sa MCWD ang labing dagkong kontrabida, paabota sa mosunod nga mga adlaw nga mangopya sab ang mga opisyal sa ubang mga lungsod ug dakbayan sa Metro Cebu.

May gamhanang mga opisyal nga ganahang mosakmit sa liderato sa MCWD apan nasango kay di diay kahilabtan ang mga tinudlo ni Osmena. Maong gisugo ang lokal nga mga opisyal paglusad sa kampanya sa panghudlat ug pakauwaw.

* * *

Labing lig-on nilang sukaranan sa pagpalayas sa mga tagduma sa MCWD mao ang kapakyas sa pagtagbaw bisan katunga na lang sa kinatibuk-an nga panginahanglan sa tubig sa mga molupyo sa Metro Cebu.

Apan nagkuwang na sa tubig ang Metro Cebu sa niaging tulo ka dekada. Mao tingali nga karon na lang sila nagyawyaw kay sa dakong bahin sukad sa pagkatukod sa MCWD niadtong 1974 ila mang mga alyado ang mga tagduma.

* * *

Unang nisuway ang Kapitolyo pagsakmit sa liderato sa MCWD niadtong 2002, o 17 ka tuig nang nilabay, dihang si kanhi Gobernador Pablo Garcia niinsistir nga siya ang angayng motudlo sa mga tagduma sa MCWD kay wa nang kaabot og 75% sa mga konsumidor ang taga Cebu City.

Apan gibasura sa Korte Suprema ang baruganan ni Garcia ug ang gisandigan niyang probisyon sa Presidential Decree No. 198: Ang makatudlo sa mga sakop sa Board of Directors sa MCWD mao gihapon ang mayor sa Cebu City nga maoy nahimutangan sa 61.28 porsiyento sa mga konsumidor. Ning uwahi nilang maniobra, wa pa diay sila motagam.