Pagbaha sa kuwarta sa China
Atubangan sa pagbaha sa kuwarta sa mga negosyante sa China dinhi sa Sugbo ug ubang bahin sa nasud, nga nakapasulbong sa presyo sa kabtangan sa mga dakbayan ug bisan sa mga isla, nitumaw ang mga pagduda kon natuman bang mga lagda nga nagdili sa mga langaw sa pagpanag-iya og yuta dinhi sa ato.
Karong bag-o lang, nahalin ang usa sa labing karaan nga hotel sa Sugbo. Dakong opisyal sa gobyerno ang nihikay sa transaksyon. Apan gidudahan nga grupo gikan sa China ang nipagawas sa kuwarta nga nakapakumbinser sa mga tag-iya pagbaligya.
***
Ubos sa balaod makapanag-iya ang mga langyaw og condominium units apan di yuta. Sa ato pa, di mahimong mangompra og lokal nga hotels, subdivisions, beach resorts, ug mga asyenda ang taga China. Apan may mga lusot nga gitakda ang balaod aron nga mapatigbabaw ang mga transaksiyon nga susama sa nahisgutan sa ibabaw:
- Magtukod og lokal nga kompaniya nga panag-iyahon ang 60% sa mga Pilipino ug 40% sa mga langyaw; o
- Magminyo ang mga langyaw og mga Pilipinhon nga asawa o bana nga mao’y ilista nga mga tag-iya sa titulo sa yuta.
***
Kay komplikado na man kon magdalidali og pakasal ang mga taga China ug ang dakong opisyal sa gobyerno nga ilang kakonsabo, ang mas sayon nilang alternatibo mao ang pagtukod og lokal nga kompaniya nga ipa-rehistro sa Securities and Exchange Commission. Apan kinahanglan nga mamakak sila aron di masilotan sa Anti-Dummy Law:
- Kon mga langyaw ang nihatag sa tanang kuwarta;
- Kon mga langyaw ang tinubdan sa tanang teknolohiya; ug
- Kon mga langyaw ang nagpadagan sa kompaniya.
***
Tungod sa pakigsuod ni Presidente Rodrigo Duterte ni Presidente Xi Jinping ang Pilipinas nisaka gikan sa ika-19 ngadto sa ika-12 sa mga nasud nga destinasyon sa mga negosyante sa China. Ug ang Sugbo mao’y ikatulo nga kinaham nilang destinasyon sa Pilipinas sunod sa Manila ug Makati.
Kay wa na may kahigayonan gikan karon hangtod sa 2022 nga malibkas ang pagdili sa 1987 Constitution sa pagpanag-iya og yuta sa mga langyaw, hiningusgan na lang nga ipatuman ang nasudnong paglingiw sa SEC ug ubang buhatan sa gobyerno sa kalapasan nga gipadaylang sa taga China ug sa ilang mga kakonsabo.
- Latest
