Kanus-a hingpit magpinuhalay
Dayong tapos sa 2018, may maayong mga timaan sa kumpetinsiya sa mga kompaniya sa lana sa Pilipinas: Inay sa naandan nga pagdungan sa pagpatuman ug pagkopyahay hangtod sa kataposan nga usa ka dako sa uminto o laslas sa presyo sa ilang mga produkto:
• Managlahi na ang mga us-os, nagligas ra hinuon og 5 sentabos ngadto sa 10 sentabos matag litro, nga ilang gipatuman sa nangaging mga semana; ug
• Wa na magpaabot sa Martes sa pag-usab sa ilang presyo, may mga kompaniya nga nagsugod og laslas sa ilang presyo sa weekend.
* * *
Labing agresibo nga nisuway pag-usab sa makapanghuy-ab nga naandan nilang agad-agad sa nangaging katuigan ang Phoenix Petroleum, ang ikaupat nga labing dakong kompaniya sa lana ug labing daghan og natukod nga gasoline stations sa Sugbo ug ubang bahin sa Pilipinas karong tuiga.
May mga higayon nga ang Phoenix nilaslas sa ilang presyo sa alas-12 sa udto sa Sabado, dul-an sa tulo ka adlaw sa wa pa mopaubos sa ilang presyo ang ubang mga kompaniya. May mga higayon sab hinuon nga ang laslas sa Phoenix mas ubos kay sa mga kumpetinsiya.
* * *
Wa hinuon moapil sa kiat sa Phoenix ug ubang bag-ong kompaniya ang tulo ka higante nga mga kompaniya sa lana. Ang Petron, Shell, ug Chevron (kanhi Caltex) nagpaabot gihapon sa alas-6 sa buntag sa matag Martes sa pag-usab sa ilang presyo.
Kon di magbantay ang mga karaan, mahimong makadani og bag-ong mga suki ang bag-ong mga kompaniya sa lana. Kay ang tulo ka adlaw nga mas sayong paglaslas sa presyo dako na kaayong bentaha labi na sa mga sakyanang pamasahero nga inadlawng magpatubil.
* * *
Hinaot nga makapahimus na g’yud ang mga konsumidor sa hingpit na nga pinuhalay sa presyo ug mga promo ang mga kompaniya sa lana sa bag-ong tuig. Hinaot nga matinuod na g’yud ang gawasnong kumpetisyon nga maoy gidasig sa deregulasyon sa industriya sa lana.
Makapasubo hinuon nga ang mga kompaniya sa lana padayong nibalibad sa sugo sa Department of Energy (DOE) pag-detalye sa ilang gasto sa pag-apud-apod sa lana aron nga mabantang sa mga konsumidor unsa kamakiangayon ang ilang uminto o laslas sa presyo. Mas lisod sabton nganong wa mamugos ang DOE.
- Latest
